Misulbong entries sa second leg sa I Love Cebu Tri Series
CEBU, Philippines - Halos midoble na karon ang numero sa mga entrante sa second leg sa "I Love Cebu Tri Team Championship Series" nga gikatakda sa Pebrero 2-3 didto sa Dalaguete, Cebu.
Gilauman nga mas modaghan pa kini dihang ang mga tigpasiugda sa kalihukan milugway sa ilang registration period hangtod sa Enero 27.
Sa ulahing kuwentada, ang kiddies triathlon may 32 na ka entries lakip na ang mga batan-ong triathletes gikan sa Bohol ug Dipolog. Samtang sa adults miabot na sa 200 ka mga partisipante apil na ang WS Tri Team nilang Louie Villacin ug Neil Reyes.
Ang Fish 18 maoy nag-una sa series nga adunay 150 points gisundan sa Parklane sa ilang 64 points.
Bisan pa niini, si Ralph Arche sa Parklane masaligon nga makagukod kini atol sa second leg ug masuwertihan ilang maunhan ang Fish 18 ilabi nga anaa na nila karon si Loveleinell Casidsid.
Ang sprint event dili lang sa mga beginners, kun dili alang sa beteranong triathletes, kinsa buot mosalmot og short court isip kabahin sa ilang training alang sa mas daku ug lisud nga kompetisyon.
Gawas sa standard distance, aduna say gipuno nga sprint distance.
Hinuon, ang mga partisipante ubos sa sprint action dili kaapil sa point system. Ang point system alang lang sa tri team ug relay championships. (BANAT SPORTS)
- Latest
- Trending
