Riders andam na sa Kopiko Supercross Series

CEBU, Philippines -   Mga local ug international riders ang mag-abot dinhi sa Sugbu alang sa  Kopiko Astig 3-in-one Supercross Series karong Sabado ug Domingo didto sa South Road Properties (SRP).

 Ang duha ka adlaw nga kompetisyon giisip nga usa sa labing dakung supercross tournament nga mahitabo dinhi sa Sugbu.

 Nasayran nga lima ka elite Danish riders ang mohagit sa mga local talents.

 Gawas sa mga riders sa Denmark, gipaabot usab ang pagsalmot sa mga daredevils gikan sa Malaysia ug Japan.

 "In this tournament, you will witness top riders all over the country against visiting international riders,"  matud pa ni Jake Alcordo sa Man and Machine Racing Promotion atol sa  senemanang SCOOP Forum nga gidumala ni Bobby

Inoferio kagahapon didto sa Baseline Restaurant.

 Ang  lumba adunay 12 ka legs nga ipahigayon sa nagkadaiyang bahin sa nasud. Sugdan kini dinhi sa Sugbu ug matapos sa Manila.

 Motubag sa hagit sa mga international riders mao   sila si Jon-Jon Adlawan ug managsuong Jovanni ug Jubenile Abellar sa Team Kopiko.

 Makiglumba usab ang mga top riders gikan sa kaulohan nga sila si Glenn Aguilar ug Jovie Saulog.

 Gawas sa Cebu ug Manila, mangabot usab ang mga riders gikan sa Mindanao lakip na ang koponan sa assistant trainer ug suod nga higala ni Manny Pacquiao nga si Buboy Fernandez.

 Moabot ngadto sa dul-an P500,000 ang giandam nga ganting salapi alang sa mga mananaog sa maong torneyo nga gisuportahan sa National Motorcycle Sports and Safety Association (NAMSSA). (BANAT SPORTS)