Smart Gilas MIDEMOLIS sa Indonesia

CEBU, Philippines -  Walay kukaluoy nga gilubong sa  Smart Gilas Pilipinas ang  Indonesia, 110-78  sa 19th Super Keung Sheung

Cup International Basketball Championship sa miaging gabii didto sa Queen Elizabeth Stadium sa Wanchai, Hong Kong.

 Ang kanhi collegiate standout nga si Garvo Lanete maoy mibaswat sa Smart Gilas sa iyang 23 puntos, samtang

si KG Canaleta,  kinsa usa sa mga PBA reinforcement ug mihukom nga moduwa sa national team miamot og 17 puntos.

 Ang PBA superstar nga si Gary David mitampo og 14 puntos, samtang ang duha ka kanhi NCAA stars nga

sila si Jake Pascual ug Kevin Alas adunay 12 ug 11 puntos matag usa.

 Gikan sa 11 puntos nga labaw sa first half, 49-38, misilaob ang opensa sa Smart Gilas diin miposte kini og 18

puntos nga abante, 83-65 sa fourth period.

 Nagmaya si  Smart Gilas coach Chot Reyes sa gipakita sa iyang batos bisan pa'g gilangkuban lang kini og mga

cadet players kay wala pa miduwa ang  PBA superstars sa iyang koponan.

 Hinuon, si Reyes dili gusto nga mokompiyansa ang Gilas aron makab-ot ang iyang gidamgo nga  mokampiyon

sa maong  torneyo nga usa sa ilang mga tune-up tournament sa dili pa ang 27th FIBA Asia Championship sa  Agosto.

 Ang Smart Gilas   moduwa karon batok sa host Hong Kong sa dili pa nila tapuson ang Group stage batok sa

Malaysia ugmang adlawa. (BANAT NEWS)