Pagara mi-ko ni Merlin sa 'Sinulog boxing'

CEBU, Philippines - Gipakita na sab ni rising bantamweight prospect Albert 'Prince' Pagara nga siya ang umaabot nga boxing star gikan sa ALA Boxing Gym human niya gi-KO si Jilo Merlin sa main event sa Sinulog boxing nga gipasiugdahan sa ALA Promotions ug Cobra Energy Drink niadtong Domingo sa gabii didto sa Gaisano Countrymall carpark sa Brgy. Banilad, ning siyudad.

Human niya masukod ang abilidad ni Merlin sa unang duha ka round, si Pagara mipabuhagay dayon sa tinagoan niyang kusog gamit ang nagpungasi niyang mga bodyshots hinungdan nga nalup-og kini sa  third round sa oras nga 1:38.

Sa maong kadaugan, si Pagara miinat sa iyang rekord ngadto sa 15-0, 11KOs ug nakuha usab niya ang katungod nga moaway  alang sa Philippine bantamweight title nga kasamtangang gihuptan ni Monico Laurente.

Sa supporting main event, si reigning Phl light flyweight champion Jerson Mancio (17-3, 7KOs) midaog pinaagi sa 10-round unanimous decision batok ni Gerpaul Valero (13-14, 9KOs).   Ang duha ka fighters isog

nga nagsinukliay og kumo, apan si Mancio mipatigbabaw sa away diin ang mga hurado mihatag og  96-94, 96-94 ug 97-93.

Sa undercards, si Jimmy Paypa mipilde ni kanhi two-division PABA titlist Marvin Tampus pinaagi sa "unanimous decision,"   si Reymund Tabogon midaog sab batok ni Abel Gayhun pinaagi sa technical decision.

Gipilde usab ni Richard Barrios ang kontrang si Rolando Sanchez, si Rolando Servania midaog batok ni Joy Formenter, samtang  tabla   ang   away  nilang   Freddie Bisande ug Ivor Lastrilla.