Binukbukay sa J Centre

CEBU, Philippines - Kulbahinam nga aksiyon sa sukmad-patid ang masaksihan sa  pagsikad sa Universal Reality Combat Championship (URCC)-Cebu: Survival karong gabii didto sa J Centre Mall Convention Hall sa A.S. Fortuna St., Mandaue City.

 Moaway sa main event mao ang garbo sa Sugbu nga si Cary 'The Prince' Bullos, kinsa moharong sa gikahadlokang Japanese fighter nga si Hedio "Death from Tokyo" Morikawa.   Ang reigning URCC Visayas bantamweight champion nga si Bullos wala mosaad og knockout o submission, apan iyang gipasalig nga buhaton ang tanan aron mahatagan og dungog ang mga Cebuano fans.

 "Di ko mosaad og knockout o submission, pero I will give them a good fight," matud pa ni Bullos nga adunay tulo ka daog batok sa  usa ka pilde.

 Si Morikawa sa iyang bahin,  laraw nga mokulit og daog  aron matabunan ang   duha ka sunod-sunod nga kapildihan batok sa duha ka Filipino strikers nga sila si Jessie Rafols ug Reysaldo Transmonte.

 "I will use my advantage that is my speed to beat him (Bullos),"  matud pa sa Karate expert nga si Morikawa. 

Sa supporting bout, magsangka sila si  Ground and Pound lightweight champion Lorde Rey Yamit sa Python’s Pit batok ni Jimmy 'Silencer' Yabo, ang teammate ni Bullos sa SELDEF MMA.

 Sa undercard magsangka sila si undefeated Vaughn 'Spawn' Donayre sa Yaw-Yan ArDigma ug DEFTAC

Cebu batok sa veteran Mindanao fighter nga si Allan Atup sa Python’s Pit Mindanao.

 Mokompleto sa fight card mao ang sangka nila ni Roel Rosauro batok Jeremy Quinonero,  Alexander Abraham batok Philipe Demecilio, Arnel Ylanan batok Jhonjher Torbiso, Moises Nodalo batok Ervin Musico ug Rodel Rejalde batok Leo Rodrigo.