Casimero adto sa Panama modepensa
CEBU, Philippines - Mosungasong og lisud nga pagsuway si IBF light flyweight champion Johnriel 'Quadro Alas' Casimero (17-2, 10KOs) tungod kay adto kini manalipod sa iyang bakus sa Panama, ang balwarte sa kontra niyang si Luis 'Pan Blanco' Rios (18-1, 13KOs).
Kini ang gikompirmar ni SGG Sports Promotion big boss Sammy Gello-ani.
Si Gello-ani nagkanayon nga pakyas sila sa pagdala sa away dinhi sa nasud tungod usab sa kakulang sa badyet ug walay TV station nga mosuporta kanila.
Gawas ni Casimero, laing Pinoy usab ang dad-on ni Gello-ani didto sa Panama mao si John Mark Apolinario,
kinsa moaway alang sa interim WBA bantamweight title batok ni Roberto Vasquez.
"With two titles at stake, it is very hard to get a network here to support us hence we opted to go to Panama," matud pa niya.
Masaligon si Gello-ani sa abilidad sa iyang batos nga si Casimero nga makapanalipod sa iyang bakus ilabi na kay sinati na kini nga moaway sa langyaw'ng nasud.
"Casimero has proven he can fight anywhere," sumala pa ni Gello-ani.
Ang 22-anyos nga si Casimero milabni sa IBF title human sa iyang 10th round TKO nga kadaugan batok ni Luis Alberto Lazarte niadtong Pebrero didto sa Argentina.
Sa labing una niyang title defense niadtong Agosto, ang garbo sa Ormoc City nga si Casimero milampos pagpilde sa kanhi undefeated Mexican nga si Pedro Guevara didto sa Mexico. (BANAT NEWS)
- Latest
