Nash, Lakers midaog

CEBU, Philippines - Milampos dayon ang Los Angeles Lakers sa pagbalik og duwa ni Steve Nash kinsa dako'g natabang sa ilang 118-115 nga kadaugan batok sa Golden State Warriors kagahapon sa nagpadayong duwa sa NBA regular season didto sa Staples Center sa Los Angeles, California.

Daghang krusyal nga mga assists si Nash aron maka-iskor si Kobe Bryant ingon man sa lain pa niyang mga teammates nga kanunay niyang gihimo sulod sa 17 ka tuig nga NBA career.

Mibahug og 34 puntos si Bryant uban sa iyang 10 ka rebounds samtang si Nash miamot og 12 puntos ug may siyam ka assists sa iyang pagbalik og duwa sulod sa duha ka buwan nga pahuway tungod sa piang.

Naka-rally ang Lakers gikan sa ilang 14 puntos nga biya sa fourth quarter aron mulampos pagpukan sa Warriors.

Nagkanayon si Bryant human sa ilang kadaugan "It's easy. It's very easy. It's beyond easy.'' Wala makaduwa si Nash tungod sa piang sa iyang wa'ng paa.

Matod pa sab ni Bryant kalabot sa duwa ni Nash ''You put two guys together who can do opposite things and it fits extremely well. When I get a rebound, I look to get the ball in his hands because I know I will be getting an easy shot.''

Naka-igo og triple silang Metta World Peace ug Nash sa kataposang minuto sa fourth quarter sa wala pa mosikit og usab ang Warriors. Mitapos si World Peace og 20 puntos sa maong duwa aron tabangan ang Lakers pagkulit sa ilang ika-upat nga sagunson nga daog.

Mikabat og 20 ka changes, walo ka deadlocks ang maong duwa nga gitambongan og kapin sa 19 mil ka fans.

Si Jarrett Jack maoy nangu sa Warriors sa iyang 29 puntos ug si David Lee midugang og 20 puntos ug may 11 ka rebounds.