ACP Megabond kampiyon na sa LLSC cagefest
CEBU, Philippines - Sangko sa langit ang gibating kalipay ni ACP Megabond team owner Neil Belga human gilangkat ang korona sa Lapu-Lapu Sports Club (LLSC) basketball tournament niadtong Miyerkules didto sa Agus gym sa Lapu-Lapu City.
Apan dili ingon kasayon ang nabatonan nga kalampusan sa ACP Megabond gumikan kay miagi pa kini og
overtime sa wala pa sila makaipsot sa kulbahinam nga duwa batok sa karibal niining Mega L.A. ni Leo Almacin sa iskor
nga 88-85.
Ligas kaayo ang duwa diin milabaw la'g uno punto ang Mega L.A. sa first quarter, 21-20. Ang Mega L.A.
padayon midiktar sa duwa hangtod na sa final period apan ang mapangahasong ACP Megabond mi-rally aron ilogon ang
labaw.
Nahimong kulbahinam ang duwa dihang nakatabla ang Mega L.A., 74-all human sa basket ni Pompy Ngujo sa
katapusang 16 segundos sa duwa.
Maangkon unta sa ACP Megabond ang sayong kadaugan dihang ila ang bola sa nahabilin sayes segundos sa
duwa, apan misipyat si Junjun Oyao sa iyang tira hinungdan sa overtime.
Sa overtime, wala kapugngi ang ACP Megabond ilabi na nga mikatol og maayo ang mga kamot ni Joprex Vilo,
kinsa maoy nagdala sa duwa.
Si Olan Velasquez maoy topscorer sa ACP Megabond nga mihipos og 19 puntos, gisundan ni Neil Belga nga
adunay 18 puntos.
Sila si Oyao ug Junjun Hesalta miiskor sab og double figures alang sa kadaugan.
Ang pilderong Mega L.A. gipangulohan ni Gil Booc, kinsa milansang og 21 puntos. Ang team owner nga si
Almacin ug Ngujo mitimbre og 16 puntos matag usa, samtang si Rene Cuadra miambit og 13 puntos.
Ang torneyo nahimong malampuson tungod sa pagpaluyo sa Rollway Customs Brokerage ni Rolly dela Pieza,
Roro Transport ni Roilan Sumilang, Alan Yu ug sa JB Sportswear ni Billy Nadado. (BANAT NEWS)
PUNTOS MATAG USA
ACP MEGABOND (88) - Velasquez 19, Belga 18, Oyao 13, Hesalta 11, Tampus 7, Damolo 5, Vilo 5, Arac
4, Montero 4, Cañezo 2
MEGA L.A. (85) - Booc 21, Ngujo 16, Almacin 16, Cuadra 13, Asuncion 9, Ruiz 3, Aparta 3, Balberona 2
- Latest
