Azkals layugon karon sa Lions
CEBU, Philippines - Nanganti ang mga magduduwa sa three-time champion Singapore Lions nga ihawon ang bisitang Philippine Azkals sa second leg sa 2012 AFF Suzuki Cup semifinals didto sa Jalan Besar Stadium.
Ang Lions ug Azkals maglayog karong alas-8 sa gabii.
Ang naturalized player sa Singapore nga si Daniel Bennett miingon nga kun igo lang nakatabla ang Azkals kanila niadtong Sabado didto sa Rizal Memorial Stadium, mas maglisud ang bisitang koponan pagpilde kanila ilabi na sa ilang teritoryo duwaon.
"I think they (Azkals) know when they come to Singapore it is going to be even harder for them. We’ll be waiting for them in Singapore . I think it is going to be a tough game for them,” matud pa ni Bennett sa InterAKTV.com
Krusyal ang kadaugan alang sa Azkals aron makuha nila ang labing una nilang finals slot sa Suzuki Cup. Apan ang Lions andam nga molaksi sa damgo sa Azkals.
Hinuon, si Azkals coach Hans Michael Weiss namahayag nga daku sila og kahigayonan nga modaog didto sa Singapore sama sa ilang nabuhat niadtong miaging buwan sa usa ka friendly game diin sila midaog sa iskor nga 2-0. (BANAT NEWS)
- Latest
