Mindanao lumakas ang laban sa kampeonato

MANILA, Philippines - Pinalakas pa ng mga atleta ng Mindanao ang laban sa 7th BIMP-Eaga Friendship Games nang manalo sa tennis at pool events na ginagawa sa SOCSARGEN.

Sina Jennis Celine Dizon at Rubylito Saga ang siyang hinirang na kampeon sa women’s at men’s singles laban sa mga kababayan sa tennis na nilaro sa General Santos City.

Tinalo ni Dizon si Precean Rivera, 3-6, 6-1, 10-3, habang si Saga ay nanaig kay Jhun Alcoseba, 6-4, 6-3.

May dalawang ginto naman si Tiara Tudio sa swimming events sa South Cotabato Sports Complex.

Nanalo ang 18-anyos na si Tudio, na mag-aaral ng UP at kumukuha ng kursong sports science, sa girls; 50-meter at 200m breast stroke.

May 36.90 segundo oras si Tudio sa 50-m para manalo laban kina Freda Cheng ng Sabah (37.20) at Sarah Ann Thopr ng Sarawak (38.28) habang gumawa siya ng 2:56.56 sa 200m breast upang maliitin ang hamon nina Elly Xin Ping ng Sabah (3:03.98) at Pinay swimmer Samantha Cambronero (3:06.15).

Nagpaparamdam naman ang mga dayuhang tankers na sina Chris Tan Li Ling, Wilson Sheng at Freda Cheng Ru matapos makalangoy sa tig-limang ginto.

Si Ling na kasama ni Ru sa Sabah ay nagkampeon sa girls’ 100m at 200m back, 400m individual medley, 400m medley relay at 4x200m relay kasama si Ru na kampeon sa 50m at 100m fly, 400m free at 4x100m relay.