Relihiyon ang gibasol

Dili tingali malalis nga niining pipila ka milabay nga katuigan, duna'y kausaban ang kinabuhi ni Pinoy boxing icon Manny Pacquiao ug usa na niini ang iyang pagbalhin og relihiyon.

Medyo nalipay tingali ang pamilyang Pacquiao ilabi na ang hamiling kapikas ni Pacman nga si Jinky tungod kay wala na igdungog nga nalambigit siya'g babaye sukad nga mitapon siya'g laing relihiyon.

Samtang kalmado ang eight- division champion ug atong boxing hero nga si Pacman dihang gi-interbyu siya kalabot sa iyang daw dili katuohang kapildehan human mahiagom sa knockout punch ni Juan Manuel Marquez nga mitugpa sa iyang suwang, wala makapugong ang inahan ni Pacman nga si Dionisia Pacquaio o Mommy D kinsa nagpahungaw sa iyang gibating kayugot sa mga pastor nga maoy iyang gitumbok nga numero unong nakabalda sa iyang boxing career.

Nagsuwat ako'g NBA gikan sa internet alang sa Banat Sports samtang nakighinabi ang GMA-7 reporter nga si Mark Salazar kang Mommy D ug igo lang akong naminaw sa iyang gipanulti apan tataw kaayong misampak sa akong duha ka dunggan nga naghisgot siya'g mga Pastor nga kanunay mag-adtoan ni Manny aron mopahigayon og mga prayer meeting.

Mitug-an si Mommy D nga maminaw hinoon gihapon kaniya si Pacquiao kung iyang maymayan apan duna kini "sikreto" nga himoon tungod lagi kay "makulit" ang mga pastor.

Daw wala gyud ikatago ni Mommy D ang iyang pagmahay nganong namalhin og laing relihiyon ang magtiayong Pacquiao. Mitug-an si Mommy D didto sa GMA-7 pinaagi sa pag-ingon "Ang nakapagpa-champion sa anak ko, ang dati niyang relihiyon na pinanggalingan niya."

 Ang minilyon ka mga boxing fans ni Pacquiao nakamatikod nga dili na kini manguros ug wala na sab kini magsul-ob og rosaryohan ibabaw sa ring nga maoy iyang naandan matag saka sa ring ug naghatag og simbolo sa iyang pagka-relihiyosong Katoliko.

Ang Romano Katoliko maoy dominanteng relihiyon dinhe sa Pilipinas ug daghan kanila mga fans sab ni Pacquiao.

Pipila sa misaksi sa away nga mitan-aw sa pay-per-view mipasiaw nga may posibilidad gyung mapilde o ma-knockout si Manny tungod kay ang rosaryohan ug ang pagpanguros maoy iyang naandang gimbuhaton apan kagahapon, lahi na ang ilang nakita kang Pacquiao.

Sukwahi kini kang Marquez kinsa usa ka Katoliko nga ilang nakitang nanguros ug nag-ampo pa gyud didto sa iyang corner.

Human sa resulta sa away kagahapon, nabahin ang katawhan-- dunay nagtuo nga ang iyang pagbiya sa relihiyon ang hinungdan apan duna sa'y nagtuong dili kini rason aron mapildi si Pacquaio kay bisan ug kapila ka pa manguros kung mapilde ka, mapilde ka man gyud. Aduna kini kalabotan sa gitawag og "murphy's law" diin aduna gyu'y pagkatapos o utlanan bisan unsang butang.

Dili lang kini mahitabo sa boxing apan sa basketball, sa chess, sa tennis ug sa swimming o sa bisan unsang matang sa pakigbisog. Sa natad sa sports duha ray padulngan---kung dili mapilde aw, modaug ka.

Lahi na sab ang lifestyle karon ni Pacquiao ilabi na kay usa sab siya ka kongresista ug dili kalikayan nga dunay mga higala nga mo-imbitar kaniya.

Pilde man si Pacquiao apan walay nasayud kun moretiro na ba siya o mopadayon sa pamoksing.