Adlawan mihimo'g double victory

CEBU, Philippines - Mihimo'g "double victory" ang multi-titled Cebuano rider nga si Jon-Jon Adlawan sa farewell race sa MS Motosuit Motocross Series niadtong Domingo didto sa Sudtungan racetrack sa barangay Basak, Lapu-Lapu City.

Gihurot ni Adlawan ang tanan niyang abilidad aron  sakmiton ang korona sa expert ug pro divisions.

Gipilde ni Adlawan ang kauban niyang MS Motosuit image model nga si John Flores alang sa titulo sa expert   division ug Salmer Longakit sa pro open, samtang si Cyril Tariman mitapos sa ikatulo sa  maong mga dibisyon.

Nakabitbit sab hinuon og korona si Flores dihang iyang gidominar ang intermediate class. Sila si Dongkey Sanchez ug Jougie Basco miokupar sa mosunod nga duha ka dapit.

Nakakawat sab og salida si Sanchez dihang naghari kini sa open enduro ug novice production. Iyang gipilde si Sadam Gungob sa duha ka dibisyon.

Sa laing bahin, si Basco maoy  nanghawod sa beginners production. Sila si Bryan Villano ug Denmark Supatan miangkon sa ikaduha ug ikatulo nga dapit.

Hinuon, si Supatan mibitbit sab og titulo pinaagi sa mini class 85cc. Gipilde niya si Brylle Ornopia, samtang si JP Cuesta nalandig sa ikatulo.

Ang big boss sa Keiz BJ Motors nga si Siegfred Ornopia milangkat sa korona ubos sa executive A division human niya gipilde ang karibal nga sila si Ayen Ledesma ug Roscel Gungob nga miangkon sa ikaduha ug ikatulo nga dapit.

Lain pang mga mananaog mao sila si Jun Enriquez (executive B), James Doroy (executive  C), Yonard Gelo (mini 65cc), Ryan Quirol (local enduro) ug Willy Borces (underbone).

Ang MS Motosuit big boss nga si Lou Ornopia mohunong na sa iyang motocross series ug mobalhin sa underbone ug scooter racing sunod tuig  sa pakig-alayon sa FDR Tires. (BANAT SPORTS)