Talisay City padayong naghari sa Gullas Cup
CEBU, Philippines - Nagpabilin gihapon nga hari ang Talisay City human sa malampuson nilang pagdepensa sa ilang korona sa 2012 Gullas Cup.
Ang Talisay mipukan sa Minglanilla sa iskor nga 82-71 sa finals sa miaging gabii didto sa Talisay City Sports Complex.
Sa sayo pa, ang Carcar City mipukan sa San Fernando, 100-95 aron sakmiton ang third place trophy.
Nakabentaha og uno punto ang Minglanilla sa first period sa iskor nga 21-20, apan mao kadto ang katapusan nilang pagtilaw og labaw kay ang Talisay mibawos og ataki.
Milusad og mainitong rally ang Talisay sa nanghinapos nga bahin sa second period aron moposte og 15 puntos nga labaw, 55-30 ug wala na kini molingi pa sukad niadto.
Si Giovanni Tabay miposa og 21 puntos, samtang si Arviel Cabanero mitira og 20 puntos alang sa Talisay. Sila si Christopher Obeso ug Joshua Romelle dela Cerna nagkumboya og 30 puntos.
Nangulo sa Minglanilla mao si Dennis Ferraren nga miburak og 24 puntos, gisundan ni Brian Heruela nga mitampo og 13 puntos ug si Raymond Tapanan adunay 10 puntos. (BANAT SPORTS)
- Latest
