Rollway nakauna sa series
CEBU, Philippines - Giangkon sa Rollway Customs Brokerage ang Game-1 pinaagi sa paglubong sa Mega L.A., 84-70 sa ilang "best-of-three" series sa bracket B sa Lapu-Lapu Sports Club (LLSC) basketball tournament 2012 niadtong Biyernes sa gabii didto sa Crown Regency sports gym sa Gun-ob, Lapu-Lapu City.
Ang Rollway ni team owner Rolly dela Pieza maoy nikontrolar sa duwa, hinuon wala kini makalabaw og daku sa unang tulo ka kuwarter. Didto na sila naninuod sa final period sa kombinasyon nilang Jimboy Enriquez, kinsa maoy topscorer sa iyang 22 puntos, Gomer Lobingco, Brañanola Centes, Amay Palad ug Rolly dela Pieza nga pulos sab nakakuha'g double figures.
Si Lobingco miani og 14 puntos, si Dela Pieza mipupo og 13 puntos, samtang sila si Centes ug Palad mitampo og 10 puntos matag usa alang sa Rollway nga nagkinahanglan na lang og usa ka daog aron moabante sa finals sa ilang bracket.
Ang Mega L.A./Jhonmar nilang Lheo Almacin ug Marlon Llenes gipangulohan ni Pompey Ngujo, kinsa mitikdol og 18 puntos, gisundan ni Gil Booc nga mitimbre og 16 puntos.
Sa laing aksiyon, nakauna sab ang Aries Lending ni Tito Francisco batok sa AJY Bong ni Allan Yu pinaagi sa pag-eskapo bitbit ang 84-83 nga kadaugan.
Si Michael Almodal mirehistro og 25 puntos aron maoy mangulo sa kadaugan. Si Onik Bergara mitimang og 18 puntos, samtang sila si Erwin Patalinghug ug Lyndon Artiaga nagkumboya og 23 puntos.
Unom unta ka players ang miiskor og double figures alang sa AJY Bong, kinsa nilabaw og 16 puntos sa third period, apan wala kapahimusli ang ilang mga puntos kay wala makalahutay ang ilang kusog sa katapusang kuwarter.
Gipangulohan kini ni Roy Genolos, kinsa mihabwa og 18 puntos.
Puntos matag Usa
Unang duwa:
ARIES LENDING (84) - Almodal 25, Bergara 18, Patalinghug 13, Artiaga 10, Inot 8, Sandal 8, Waray 3
AJY BONG (83) - Genolos 18, Flores 15, Ochea 14, Yu 13, Tero 12, Godornez 11, Gimena 8
Ikaduhang duwa:
ROLLWAY (84) - Enriquez 22, Lobingco 14, Dela Pieza 13, Palad 10, Centes 10, Pleños 7, Carusia 5, Alilin 2
MEGA L.A. (70) - Ngujo 18, Booc 16, Sagarino 8, Cuadra 8, Asuncion 8, Gutip 6, Balberona 6, Ruiz 4, Aparta 4, Almacin 2 (BANAT SPORTS)
- Latest
