Pineda naghari sa 10th leg sa Keiz BJ motocross

CEBU, Philippines -  Ang multi-titled rider sa Davao nga si Kimboy Pineda maoy nangulo sa mga mananaog atol sa  Round 10 sa 1st Keiz BJ Motors Phoenix Cyclomax Titan Motocross Series niadtong Domingo didto sa bag-ong gitukod nga racetrack sa Tuburan.

Si Pineda mipakita na sab sa iyang ngilngig nga abilidad aron maghari sa expert division, samtang sila si Amboy Yaparcon ug Salmer Longakit mipahiluha sa ikaduha ug ikatulo nga dapit.

Mikawat sab og salida si Keiz BJ Motors big boss Siegfred Ornopia dihang milangkat kini og korona ubos sa executive selection limited edition.

Gipilde ni Ornopia ang mga karibal niya nga sila si James Duroy ug Jun Enriquez nga nalandig sa ikaduha ug ikatulo nga puwesto.

Ang mga masaarong anak ni Ornopia nga sila si Brylle ug Keizer misakmit sab og korona sa tagsa-tagsa nilang dibisyon.

Si Brylle midaog og duha ka korona pinaagi sa mini class 85cc. ug sa beginners selection limited edition, samtang si Keizer naghari sa peewee class.

Bugtong si Brylle lang ang rider nga miposte og double victory sa maong lumba nga giuloha'g "Mayor Democrito Diamante Motocross Competition."

Sila si Russell Gungob, Gener Sicad ug Jun Enriquez maoy top three finishers sa executive A division, samtang sa executive B mao sila si Alex Abalo, James Duroy ug Nanding Pepito.

Ang top three sa local enduro mao si Sadam Ganub, Salex Abalo ug Salmer Longakit.

Sa beginners open mao sila si Dan Andrei Gastador, James Mayol ug Ryan Panilag.

Mipatigbabaw sab si Pewee Galia sa mini class 65 cc. batok nilang Gelo Leonardo ug Tammy Largosa, samtang si James Mayol maoy naghari sa habal-habal batok nilang Kent Limpag ug Willie Borces.

Ang usa ka adlaw nga lumba nga gipahinungod alang sa ika-51 nga kasumaran sa adlaw'ng natawhan ni Mayor Democrito Diamante sa Nobiyembre 30, gipaluyohan sa  Phoenix  Cyclomax  Titan, Haojue Phils., Motolite  ug  sa  RMO Motor Parts. (BANAT SPORTS)