Sector 5 mirehistro sa ilang ikaduhang daog

CEBU, Philippines - Nagsalig ang Sector 5 sa mainiton nilang rally sa final period aron mokubit og daog batok sa Sector 6, 39-36 sa nagkainit nga aksiyon sa Katipunan ng mga Kabataan Sectoral Basketball Tournament 2012 niadtong Domingo sa Brgy. Pagsabungan basketball court sa Mandaue City.

Sa gihapon, si Juan Miguel Cenabre mao na sab ang nangulo sa Sector 5 pinaagi sa iyang 13 puntos.

Pirmeng naggukod ang Sector 5 ni sectoral councilor Marnelle Frances Abayan gikan sa pagsugod hangtod na sa nanghinapos nga bahin sa fourth quarter. Gibiyaan sila og 14 puntos, 20-34  sa maong kuwarter, apan ang maong labaw gikalingawan og kitkit sa mga batos ni coach Osong Daquiado.

Mitira og three pointer si Cenabre aron makan-an ang labaw ngadto na lang sa tres puntos, 33-35. Nasundan sa three-point play ni Raymund Ranile aron patilawon ang Sector  5 sa labing una nilang labaw, 36-35. Gikan niadto, wala na makarekober ang Sector 6 ni sectoral councilor Ronel Surbano hangtod nahurot ang oras sa duwa.

Si Ranile mitampo og 13 puntos alang sa Sector 5 nga nagbitbit og 2-2 nga baraha.

Sila si Stephen Chow ug Gretche Paglinawan maoy nangulo sa Sector 6 nga mikadlit og 11 puntos matag usa.

Sa sayo pa, nagligas sab ang resulta sa duwa tali sa Sector 1 ni sectoral councilor Renante Mondijar ug Sector 4 ni sectoral councilor Armand Suson.

Ang Sector 1 midaog lang og kuwatro puntos, 49-45 ubos sa pagpangulo ni Jayvee Corbo, kinsa mipupo  og 14 puntos. Mikulit sab og double figures si Michael Taran pinaagi sa iyang 13 puntos, gisundan ni Renante Mondijar nga adunay 12 puntos.

Sila si Walter Baring ug Japin   nagkumboya og 26 puntos alang sa pilderong Sector 4.

Sa laing duwa, gipakgang sa Sector 7 ang nagkadinang daog sa Sector 2 human moiskor og 44-31 nga kadaugan.

Si John Paul Duhig miiskor og 12 puntos, samtang si Kim Judilla mitimang og 11 puntos alang sa Sector 7 ni sectoral councilor Gabriel Tudtud.

Bugtong si Alemar Palapar lang ang nakakuha og double figures alang sa Sector 2 ni sectoral councilor Ivie Vender pinaagi sa iyang 10 puntos.

Ang torneyo gipasiugdahan sa Pagsabungan Sangguniang Kabataan (SK) ubos sa ilang tsirman nga si Rey Judilla ug gipaluyohan usab kini sa barangay council ubos sa liderato ni Brgy. Capt. Andres Suson.

Ang committee gilangkuban nilang Marvin Cordero, Jesmar Tomarong, Elmar Estrera ug Clint Kevin Rodis. (BANAT NEWS)

PUNTOS MATAG USA

Unang duwa:

SECTOR 1 (49) - Corbo  14, Taran 13, Mondijar 12, Cunad 3, Monteza 2, Tapia 2, Gelig 2, Pinote 1

SECTOR 4 (45) - Japin 14,  W. Baring 12, Gimarangan 6, K. Baring 6, Yangson 3, Alin 2, Armian 2

Ikaduhang duwa:

SECTOR 5 (39) - Cenabre 13, Ranile 11, Giganto 5, Alfanta 4, Seraña 4, Ouano 2

SECTOR 6 (36) - Chow 11, Paglinawan 11, Molit 7, Perez 5, Vega 2

Ikatulong duwa:

SECTOR 7 (44) - Duhig 12,  K. Judilla 11, D. Perez 9, Osorno 6, Dimco 2, Ares 2, R. Perez 2

SECTOR 2 (31) - Ale. Palapar 10, Goc-ong 8, Riel Enero  6, Rich. Enero 4, Dampios 2, Al. Palapar 1