Azkals sa Suzuki Cup finals?
Good luck sa atong kampanya sa Suzuki Cup 2012 nga gisugdan og duwa kagabii didto sa Bangkok, Thailand.
Una natong gikasangka ang kinalig-onang team sa Southeast Asia nga War Elephants sa Thailand atubangan sa 65,000 nila ka mga fans didto sa Rajamangala Stadium.
Sa pagsulat nato niini, wala pa magsugod ang duwa, apan daku ang pagsalig nga dili basta ihatag sa Philippine Azkals ang kadaugan sa Thailand sa sayon nga paagi.
Ang Thailand presko pa kaayo sa ilang mga friendly matches sa ubang nasud diin miposte usab sila og impresibong duwa. Gikasangka nila ang FIFA ranked 26 Norway sayo ning tuiga diin napilde sila, 1-0, apan napugngan nila ang pag-abante sa Norwegians. Gipilde usab ang Bangladesh, 5-0 ug Malaysia, 2-0.
Sa atong pagsubay-subay sa mga forums sa mga Netizens sa internet daghan nang nigawas nga mga prediksyon sa resulta sa Suzuki Cup. Numero unong gipaabot nga makahimo og upset sa Suzuki Cup karon ang Azkals tungod kay daghan ang natagbaw sa komposisyon sa mga players niini ug sa estilo sa duwa. Ebidensiya niini ang katapusang friendly match sa Azkals diin midaog kini batok sa Singapore Lions, 1-0 diha sa Cebu City Sports Center (CCSC).
Anaa sa Group-A ang Thailand, Myanmar, Philippines, Vietnam, samtang Group B mao ang Malaysia, Singapore, Laos ug Indonesia.
Daghan ang nagtuo nga makasulod sa semifinals ang Thailand, Vietnam ug Malaysia ug ang Azkals. Apan daghan usab ang nagtuong ang Thailand maoy motigbabaw sa kinatibuk-ang torneyo.
Bisan unsa pay resulta sa duwa kagabii, wala ko'y laing ikasulti mao ra ni, layo na og naabot ang Azkals ug kadaghanan sa mga eksperto sa football miingon nga giusab sa Azkals ang dagway sa football sa Southeast Asia sukad nila pildiha ang Vietnam, 2-0 niadtong 2010.
* * *
Daghan pa kaayo seguro kong kinahanglang makat-onan sa football sama sa mga terminolohiya ug ingon man sa mga "history" sa matag nabantog nga mga international ug local teams. Busa kining atong lindog gipaninguha natong makahatag og ginagmay nga kasayoran kutob lang sa atong maabot.
Duna ko'y gamay nga kasinatian sa football (ako na ni nahisgutan niadtong 2010) kun matawag ba gyud kining experience, hehehe. Naapil man gud intawon ko sa among year levels (freshmen ug sophomore) squad sa team dihang nagtungha pa ako sa Notre Dame of Cotabato Boys Department sa Cotabato City. Mokalawat ko nga wala gyud ko'y klarong nasabtan sa rulings.
Dili man seguro nako to sala kay gipili man ko kaniadto kay kusog daw ko modagan, aw, dili man ta mabiyaan ana nga departamentoha kay sa akong elementary years gikan sa Grade 1 hangtod Grade 6, baseball naman intawon ang akong giduwaan. Pagbalhin nako og laing eskwelahan, balik na usab ko sa diamond field (apan softball na usab).
Apan bisan pa man interesado kaayo kong masuhito sa football ug kalipay ko nga makapaambit bisan sa gamay sa uban pa natong bag-ohay na-convert sa football.
PAGTULON-AN: Ang pag-atras timaan sa kakulang sa pangandam.
PAHIBALO: Giawhag ang tanang mga sakop sa Alpha Sigma Omega International Service Fraternity (SIOUX) sa pagdonar og dili momenus usa ka dosenang tsinelas (edad 6-12 anyos) alang sa tinuig nga "Tsinelas ni Dodong ug Inday" project. Ihatag kini ngadto sa mga opisyales sa National Board, Provincial ug City sa dili pa ang Disyembre 5. Ikatulong tuig na kining proyektoha sa maong fraternity
- Latest
