Takbo kuyog ni San Pedro ugma na

CEBU, Philippines - Gidapit ni Dilaab Movement convenor Fr. Carmelo Diola ang mga Sugbuanon sa pagsalmot sa "Takbo Kuyog ni San Pedro" ugma nga manukad sa Plaza Independencia ug matapos sa templete ni San Pedro sa  South Road Properties (SRP) diin ang National Thanksgiving Mass  sa labing unang Sugbuanong Santo himuon sa Nobiyembre 30.

Ang talagsaon nga fitness activity gikatakdang sugdan sa alas-5:30 sa buntag.

Usa kini ka paagi sa mga Sugbuanon sa pagpakita sa ilang debosyon ngadto ni San Pedro Calungsod.

"Let us connect fitness and prayer as our way of emulating the virtues of this youthful saint. San Pedro Calungsod, pray for us!" said Diola.

Mga tinun-an ug ingon man mga sakop sa police, military force ug uban pa nga mga kahugpongan ang gilauman nga mosalmot.

Si Pedro Calungsod maoy ikaduhang Filipino nga gibayaw pagka-Santo sa Simbahang Katoliko sunod ni San Lorenzo Ruiz de Manila. (BANAT SPORTS)