RoRo Transport, nakauna sa series

CEBU, Philippines - Naunhan sa  Roro Transport ni Roilan Sumilang ang Rulls Bakeshop pinaagi sa pag-iskor og 73-65 nga kadaugan sa bracket-A sa "best-of-three" semifinals sa nagkainit nga aksiyon sa Lapu-Lapu Sports Club (LLSC) basketball tournament 2012 didto sa Crown Regency basketball court sa Lapu-Lapu City.

Kontrolado sa RoRo Transport ang tibuok duwa sa giya nilang Nilo Bentain ug maayo usab pagkabahin ang ilang mga puntos.

Nakugang ang RoRo Transport sa fourth quarter dihang mi-rally ang Rulls Bakeshop sa pagpangulo nilang Ian Lachete, Edwin Amistad ug Allan Sepe, apan naulahi na ang ilang  mga paningkamot kay nahutdan kini sa oras.

Sila si Bentain ug Duran maoy topscorers sa RoRo Transports nga mihakot og 11 puntos matag usa, gisundan ni Medina nga miariya og 10 puntos.

Ang naparot nga Rulls Bakeshop ni Rupert Cañizar gipangulohan ni Lachete, kinsa mihaon og 18 puntos, samtang si Amistad migaling og 17 puntos. Sila si Sepe ug Tempurada mikutlo og 12 puntos matag usa.

Sa pasiunang duwa, ang ACP Megabond nakauna usab sa series human nila gipilde ang Orya Farms/Comfa General Merchandise nilang Elly Gomos ug Roger Ompad sa iskor nga 84-80.

Gipangulohan ni team owner Neil Belga ang kadaugan nga milansang og 30 puntos, gisundan ni Joprix Vilo nga adunay 11 puntos.

Sila si Mario Bancale ug Sherwin Candilada mipupo og 32 puntos matag usa aron pangulohan ang Orya Farms, samtang si Roger Ompad  miani og 11 puntos.

Ang LLSC tourney gipaluyohan usab sa Rollway Customs Brokerage ni Rolly dela Pieza, Roilan Sumilang, Alan Yu ug sa JB Sportswear ni Billy Nadado.

PUNTOS MATAG USA

Unang duwa:

ACP MEGABOND (84) - Belga 30, Vilo 11, Montero 8, Velasquez 8, Tibudan 8, Hesalta 6, Arac 5, Oyao 5, Tampus 3, Damolo 2

ORYA FARMS (80) - Candilada 32, Bancale 32, Ompad 11, Casinillo 9, Amodia 7, Ilustrisimo 6, Calambro 4, Dueño 4

Ikaduhang duwa:

RORO TRANSPORT (73) - Bentain 11, Duran 11, Medina 10, Poro 8, Aparente 7, Ybañez 7, Modina 6, La Peña 4, Lobongco 4, Sumilang 3, Soroño 2

RULLS BAKESHOP (65) - Lachete 18, Amistad 17, Sepe 12, Tempurada 12, Pardillo 7, Yurag 5 (BANAT NEWS)