3rd Frankie Radaza run gitakda

CEBU, Philippines - Gibana-banang moabot ngadto sa 1,000 runners ang mosalmot sa 3rd Frankie Radaza Memorial Run nga gikatakda sa Disyembre 9 didto sa Hoops Dome ground sa barangay Gun-ob, Lapu-Lapu City.

Ang tinuig nga lumba    nga gipasiugdahan ni City Councilor Harry Radaza uban sa suporta sa Lapu-Lapu City Sports Commission adunay 15K, 10K ug 5K categories.

Gawas sa paghandum sa  mipanaw niyang amahan, si Radaza nagkanayon nga ang maong lumba usa usab ka fund raising event diin ang kita niini adto mapunta sa  street children sa maong dakbayan.

"Ang proceeds nga among matigom sa lumba among gamiton alang sa pagpanghatag namo og bundles of joy sa mga streechildren sa Lapu-lapu this coming Christmas season," matud pa   ni  Radaza  atol  sa press conference kagahapon didto sa Hukad Restaurant sa The Terraces sa   Ayala   Center-Cebu.

Ang registration fee nagkantidad og P200 lakip na niini ang singlet, snacks ug usa ka libreng tiket sa Manny Pacquiao-Juan Manuel Marquez IV pay-per-view didto sa Hoops Dome sa Disyembre 9.

Mahimong magparehistro  sa Lapu-Lapu City Hall ug Runnr sa  Ayala Active Zone.  (BANAT NEWS)