Canillas-AME laraw og daog

CEBU, Philippines - Suwayan karon sa walay pildeng Canillas Customs Brokers-AME Trading (3-0) nga mokulit sa  ikaupat nilang daog   dihang ilang ikabagat ang  Cebu Basketball Mania Association (CEBAMA) sa 1st Cebu International Port Users (CIPU) Ball Club basketball tournament diha sa Cogon-Ramos gym.

Kun modaog, ang Canillas maoy unang mopasilong sa landong sa semifinals.

Sa pasiunang duwa sa ala-1 sa hapon, ang 2-0 nga FYA-Martinez Brokers makigsangka sa Petracorta Brokers nga  pangulohan ni Takloy Moral.

Ang FYA gipalig-onan sa managsuong Noel ug Baeng Medalle,  Janus Abellana, Tata Laborte, Toper Marata ug Arnel Trinidad.

Sa main game, magbagat ang Alin Brokers batok sa Avenido Brokers.  (BANAT SPORTS)