Azkals milupig sa Lions

CEBU, Philippines - Napanalipdan sa Philippine Azkals ang ilang balwarte pinaagi sa pagpilde sa bisitang   Singapore Lions, 1-0  sa ilang friendly game sa miaging gabii didto sa Cebu City Sports Center (CCSC) oval.

Si Marwin Angeles maoy mipasud sa goal alang sa Azkals atol sa ika-54 minutos sa duwa, apan ang goalkeeper nga si Eduard Sacapaño maoy nahimong bida human niya mapugngi ang pipila ka tira sa Lions.

Sa nindot niyang gipakita, si Sacapaño karon ang gitutokan ni German coach Hans Michael Weiss nga mahimong starting goalkeeper sa Azkals sa umaabot nga 2012 AFF Suzuki Cup karong Nobiyembre 24.

Si Sacapaño maoy tubag sa suliran sa Azkals sa posisyon sa goalkeeper nga gibiyaan ni Fil-British Neil Etheridge ug Roland Mueller.

Kini ang ikaduhang daog sa Azkals batok Lions human usab sa ilang 2-0 nga kadaugan niadtong Septiyembre atol sa ilang pagpanulong didto sa Singapore.

Ang Lions mihimo og 13 ka goal attempts, samtang ang Azkals adunay unom diin usa niini ang nakalusot.  (BANAT SPORTS)