UC Heat nakalingkwas sa BCH Martians

CEBU, Philippines - Ang UC Heat sa pagpangulo ni skipper Arjam Bonsucan naka-eskapo bitbit ang 80-79 nga kadaugan batok  sa BCH Martians  niadtong Domingo sa elimination round sa Philippine Institute of Certified Public Accountants (PICPA) 2012 basketball tournament didto sa USP Lahug campus gym.

Miburak si Bonsucan og 14 puntos, apan ang iyang igsuon nga si Jecon maoy nangulo sa kadaugan nga mibahog og 32 puntos lakip ang lima ka triples.

Sa maong kadaugan, ang UC Heat  nakigsawo karon sa unang dapit uban sa IBP-Gwapo sa managsamang 4-1 win-loss records.

Impresibo ang pagsugod sa UC Heat, kinsa miposte og  10 puntos nga bentaha, 23-13 sa opening period pinaagi sa opensa nga giduslitan sa managsuong Bonsucan.

Mibawos unta ang BCH Martians sa second period, apan gitiwasan sila sa Heat pinaagi sa mainitong rally  aron moabante og 12 puntos sa iskor nga 63-51 paingon sa final period.

Si Edlen Edrina maoy nangu sa BCH Martians nga mipabuto og  36 puntos, samtang si Dondon Ibo miabuno og 13 puntos.

Sa sayo pa, ang Warriors Intagibles midaog usab batok sa RP Mora-Lycans sa iskor nga 48-43.

Silang Carl Leyson ug Jansen Sevilla maoy nangu sa Warriors nga nagkumboya og 23 puntos, samtang ang Lycans gipangulohan ni Benedict Bandala, kinsa miposa og 11 puntos.  (BANAT NEWS)

PUNTOS MATAG USA

Unang duwa:

WARRIORS (48) - Leyson 13, Sevilla 10, Conde 7, Alabado 5, Dakay 4, Camiso 4, Donaire 2, Judilla 2, Monsales 1

 LYCANS (43) - Bandala 11, Ompad 9, Padios 8, Cadampog 6, Lofranco 5, Supilanas 2, Trocio 2, Ocupe 1, Oyanguren 1

Ikaduhang duwa:

UC HEAT (80) - J. Bonsucan 32, A. Bonsucan 14, Bauzon 10, Sabala 9, Galo 6, Cabuguas 6, Seno 2, Balucan 1

MARTIANS (79) - Endrina 36, Ibo 13, Alejandre 11, Flores 11, Oliveros 6, Lofranco 2