UV, HTC midaog, magtigi karon

CEBU, Philippines - Gisubha'g daog ang University of the Visayas (UV) Green Lancers ug ang Holy Trinity  College (HTC) Wildcats   batok sa tagsa-tagsa nilang kaatbang sa pagsugod sa 2012 Philippine  Collegiate Champions League (PCCL) Sweet 16 Cebu knockout stage kagahapon didto sa Cebu Coliseum.

Ang UV Green Lancers miihaw sa University of San Jose-Recoletos (USJ-R) Jaguars sa iskor nga 79-55, samtang ang Mindanao champion HTC  Wildcats sa General Santos City yano usab kaayong milubong sa Visayas title-contender West Negros University (WNU) Mustang sa Bacolod City, 101-77.

Gawas ni Angelo Babia, tanang UV Green Lancers ang nakapuntos nga gipangulohan ni CESAFI MVP Wowie Escocio nga mikutlo og 12 puntos.

Laing duha ka higante nga sila si Rene Jun Saycon ug Rhaffy Oktubre ang miiskor sab og double figures pinaagi sa ilang 11 puntos matag usa.

Si Renato Abing maoy nangulo sa giihaw nga USJ-R Jaguars nga mikawhat og 13 puntos, gisundan ni Matthew Park nga mikabkab og 12 puntos.

Gumikan sa maong kadaugan, ang UV ug HTC magtinaktakay karong adlawa alang sa katungod sa paghagit sa 12th CESAFI champion Southwestern University (SWU) Cobras sa PCCL Southern Island Championship nga gikatakda ugma sa alas-4 sa hapon.

Ang modaog maoy moabante ngadto sa PCCL Final Four uban ang UAAP five-peat champion Ateneo Blue Eagles, NCAA grandslam titlist San Beda Red Lions ug sa kampiyon sa Luzon-Metro Manila eliminations.

Ang UV-HTC showdown gitakda sa alas-2 sa hapon sa dili pa magsangka ang defending National Collegiate champion San Sebastian College (SSC) Recoletos Golden Stags ug sa UAAP third placer National University (NU) Bulldogs sa main game sa alas-4 sa hapon.

Ang makalingkawas sa SSC-NU moharong sunod sa modaog sa duwa tali sa La Salle Green Archers ug Adamson University Falcons  ugma sa alas-2 sa hapon.

Ang tanang mga duwa makita live sa ABS-CBN ug sa Studio 23.   (BANAT NEWS)