P100T giandam nga ganti sa Cebu Challenge
CEBU, Philippines - Moabot ngadto sa kapin P100,000 ang gitaganang cash prizes alang sa mga mananaog sa Cebu Challenge Mountainbike One-Day Road Race karong Domingo nga manukad didto sa Talisay City ug dayon libot sa amihanang kasadpan sa Sugbu.
Gikan sa Talisay City, ang mga elite cyclists moagi kini sa Tuburan dayon patighug sa Naga-Uling road ug Magdugo-Media Onse Road sa Toledo City.
Ang lumba adunay kinatibuk-ang distansya nga 150 kilometros.
Lakip sa kategoriya nga tigian mao ang Open/Elite, Juniors, Seniors, Executive, Women’s ug Fat Bikers class.
"This race is dedicated to our new Saint Pedro Calungsod, I hope this will be successful to make cycling more bigger not only here in Cebu but to whole Visayas," matud pa ni race organizer ug Cebu Sports Hall of Famer David 'Kuya Boy' Odilao, Jr. atol sa press conference kagahapon didto sa Chopstick Chinese Casual Chow sa Shopwise sa Brgy. Mambaling, ning siyudad.
Mga elite riders ang kompirmadong mosalmot mao sila si John Mier, Niño Surban, Jaybop Pagnanawon, Ramon Espinosa, Marvin Tapic, Noy Jopson ug Nilo Barbalose.
Mibubo usab og dakung suporta sa maong lumba sila si Cebu First District congressional candidate Samsam Gullas, kinsa mao usab ang Talisay City Sports Commissioner ug Tuburan Mayor Democrito 'Aljun' M. Diamante.
Niadtong gustong mosalmot, ang registration fee nagkantidad og P300 libre na ang jersey, pack lunch, certificate ug bike and body number. Mahimong magpalista didto sa Chopstick Chinese restaurant sa Shopwise, Edfil Restaurant sa Citi Center ug Cycle Logic-Parkmall. (BANAT SPORTS)
- Latest
