Radyo singko subhan sa kahanginan, karong adlawa ato nang madunggan

Madungog na nato sa kahanginan sugod karong adlawa ang pagsibya sa  bag-ong sakop sa Cebu broadcast industry nga mao ang Radyo Singko 101.9 News FM nga gipanag-iya sa Channel 5.

Wala nako damha nga gawas nga kabahin ako sa kasaysayan tungod kay usa ako sa mitambong atol sa yanong paglusad niini niadtong Nobiyembre 9 didto sa Summit Circle Hotel, mahibalik na sab ako sa radyo kay misugot sa akong hangyo nga mohimo'g sports news ug commentaries/analysis ang station manager nga si Karla Kintanar-Fernandez, ang roommate sa akong dugay na kaayong higala nga si Ramon "El Presidente" Fernandez, ang four-time PBA MVP nga kanhi pambato sa USC Warriors.

Gamay ra gyud diay kaayo ang kalibotan tungod kay bisan sa wala pa kami magkaila ni Karla, daan na akong nakaila sa iyang mga ginikanan nga pulos sab inilang mga broadcasters sa DYLA ang magtiayong Vicente" Jun" Kintanar ug Lee Kintanar nga angyan   mabutang sa Guinness Book of World Records isip "couples" in broadcast kay wala pa ako makadungog nga dunay magtiayong news anchors sa usa ka estayion o channel bisan pa sa CNN, BBC o bisan asang media outlet dinhi sa Pilipinas.

Tulo ka banggiitang manlalaban ang mosubo sa mga programa sa Radyo 5 diin main anchor ang kanhi atong sports editor sa The Freeman Daily nga si Atty. Francisco M. Malilong, Jr. nga maoy program host sa "Frankahay Ta" matag adlaw Lunes ngadto sa Biyernes sa 5:30 ngadto sa 9:30 sa buntag ug matag Sabado, dunay public affairs program silang Atty. Omar Redula ug Atty. Briccio Boholst sa mao gihapong oras gikan sa 5:30 ngadto na sa 9:30 sa buntag.

Dako ang akong pasalamat nga mahimong akong "Kapatid" sa usa ka estasyon nga halos tanan akong kaila. Kung sa minaldito pa kining pagkasulti "from head to foot" gyud kay kini si Atty. Redula nakaila ko kini panahon pa sa CAAA ug kini si Atty. Boholst dili gyud nako suod apan nakaila ako sa iyang amahan nga si retired Judge Jojo Boholst nga usa ka tennis afficionado.

Pun-an pa gyud nga ang news director mao si Rosemarie Holganza-Borromeo, gikan gihapon sa The Freeman ug bisan wala pa kami magkaila ni Rose, daan na kaming nagsige og kuyog sa inom sa iyang maguwang nga si Atty. Rico Rey Francis "Koko" Holganza nga karon maoy hepe sa Customs Intelligence and Investigation Service (CIIS).

Mohimo sab sa ilang maiden broadcast silang Kapatid Erwin Tulfo ug Martin Andanar karong adlawa.

Salamat kaninyo mga Kapatid.

HALAD KANG MARLON. Misaksi ako sa makadiyot sa concert for a cause didto sa Cebu Technological University (CTU) gym diin gipahigayon ang usa ka fund-raising campaign nga ginganlan og "Halad Kang Marlon" nga atong igsoon sa media kinsa padayong naa sa ospital human siya ma-stroke.

Atong mahulagway sa maong concert kung giunsa pagmahal si Marlon Bellita sa iyang mga tigpaminawan sa iyang komedya sa radyo sa dyAB, ang giilang Marc Logan of Cebu.

Gani bisa'g apike kaayo'g skedyul, mihapit pa gyud didto sa benyu si Coast Guard District Commander Capt. Rolando Pinzalan, Jr. ug wala kami manglakaw ni Vince Monterde, Oscar Pineda, Chito Aragon, Carmel Matus ug RC Dalaguit kung wala magmingaw ang CTU campus. Unang mi-uli ang CFBJ president nga si Ely Baquero.

Karong Biyernes, Nobiyembre 16, ipadayon ang fund-raising activity nga pagapasiugdahan na sa Cebu Federation of Beat Journalists (CFBJ) ug gi-awhag ang tanang sakop sa pagtambong sa Concert didto sa Cebu City Police Office (CCPO) sa Gorordo avenue sa pagtambong ug pa-donate alang kang Marlon.

See you all guys!!!.

MISCELLANEOUS. Congrats to the debutante Rose Ann V. Ladonga, the niece of my wife Gingging who turned 18 last November 10. The party was held at their residence in Alaska, Mambaling.