Ferdie nag-Sigue puntos ug tres

CEBU, Philippines - Gitabas-tabas sa streak shooter nga si Ferdie Sigue ang net sa Kai Gym ring didto sa Liloan dihang nagsige siya'g pamuntos og three-pointers diin miposa siya'g unom ka triples lakip ang usa ka four-point play aron maoy motimon sa Canillas Customs Brokerage (CCB) kinsa napilde sa duwa, 79-82 apan midaug sa lamesa batok sa Avenido Brokers kinsa napamatud-an nga mipasulod og players nga wala sa ilang orihinal nga line-up kaniadtong Sabado sa nagpadayong 1st Cebu International Port Users (CIPU) basketball tournament.

Ang board member sa CIPU nga si Jeff Garcia kinsa maoy nagsilbing tournament chairman, maoy mihukom sa duwa pabor sa CCB nga gipanag-iya ni kanhi Customs board no. 8 topnotcher Roy Canillas ug sa iyang asawa Joy Canillas nga usa ka nurse kinsa bag-o lang miabot sa Sugbo gikan sa Saudi Arabia.

Busa, nagtabla na karon sa 2-0 nga baraha ang CCB ug ang FYA-Martinez Brokers, ang duha ka teams nga wala pa makatilaw ug pilde sa kasamtangan.

Mihimo'g 19 puntos si Sigue, ang kanhi tirador sa Customs Employees and Brokers Union (C.E.B.U.), ang kanhi Group B champion sa Cebu Basketball Association, niadtong uwahing bahin sa 1990's. Silang Marvin Sillar ug Toni Largosa midugang og 15 ug 14 puntos matag usa.

Si Yulo Arevalo maoy nangu sa Avenido Brokers sa iyang 16 puntos ug si Rocky Lim miamot og 15 puntos apan ang 14 puntos nga iskor nilang duha ni Randy Francia ug J.R. Tandas didto gihatag sa CCB.

Sa sayo pa, gilamoy sa Cebu Basketball Mania Association (CEBAMA) ang Kentkyle Cuisine, 75-59 diin si Garcia misakmit og 11 puntos ug usa mga players nga mihimo'g double figures.

Gipun-an og 15 puntos ang CEBAMA isip silot tungod kay kuwang og players ang Kentkyle. 

Ikaduhang daog ang tuyo sa CEBAMA karong gabii batok sa  Avenido didto sa Basak gym.

Sa laing duwa, midaug ang Petracorta Brokers batok sa Alin Brokers, 76-62.

Puntos matag usa:

First Game:

CEBAMA (75)— Elloren 14, Manulat 12, Garcia 11, Guardinao 11, Villaronza 9, Nionez 2.

Kentkyle (59)— Bensi 20, Castillo 14, Caynilla 8, Diaz 7, Castro 7, Solidarios 3.

Second Game:

Petracorta (76)— Moral 29, Cedeno 15, Sagario 12, Pepito 7, Petracorta 4, Bontuyan 3, Agustinez 2

Alin Brokers (62)—  Estrogio 20, Villomo 13, Laurel 8, Baral 6, Herbito 5, Egpit 4, Lleve 4.

Third Game:

CCB (79)—Sigue 19, Sillar 15, Largosa 14, Villa 11, Yap 4, Piape 4, Manlosa 4

Avenido (82)— Arevalo 16, Lim 15, Francia 11, Plando 11, Cayanong 8, Ponte 4, Tandas 3, Avenido 2 (BANAT NEWS)