Phl Team apil sa ‘Cebu Challenge’

CEBU, Philippines - Mga sakop sa elite Philippine Team ang gipaabot nga madugang sa kompetisyon sa 'Cebu Challenge Mountainbike One Day Road Race' karong Nobiyembre 18.

Ang maong lumba sugdan sa Talisay City ug moagi didto sa Tuburan ngadto sa Naga-Uling Road ug Magdugo-Media Onse Road sa Toledo City.

Gipangulohan sa garbo sa Sugbo nga si John Rene Mier, laing mga sakop sa Phl Team nga musalmot sa lumba nga gipasiugdahan ni Cebu Sports Hall of Famer David ‘Kuya Boy’ Odilao Jr. naglakip nila ni  Eric Feliciano ug Eusebio "Eboy" Quiñones.

Si Mier kinsa mihatag og gold medal sa nasud sa miaging Southeast Asian (SEA) Games sa Indonesia, mao usab ang midominar sa Cebu Challenge Cycling Classic nga gipahigayun niadtong miaging Septiyembre.

Mokabat ngadto sa kapin P100,000 cash prizes ang gitagana alang sa mga mananaug sa maong lumba nga salmutan sa dul-an usa ka gatos ka mga bangiitang cyclists sa nasud.

Gawas sa mga mananaug, makadawat usab og espesyal nga Presidential Cup ug dugang P5,000 ang rider nga modominar sa duha ka stages.

Ang registration gisugdan na sa Chopstick Chinese Casual Chow-Shopwise branch, Edfil Restaurant sa Citi Center ug Cycle Logic sa Parkmall. Ang entry fee nagkantidad og P300 lakip na ang jersey, packed lunch ug race bib.

Mga players sa Ginebra dismayado

Human sa lima ka sunod-sunod nga kapildehan, mibati na og kadismaya ang mga players sa Barangay Ginebra San Miguel sa performance sa ilang koponan sa nagpadayong PBA Philippine Cup.

Sa wala pa magsugod ang torneyo, usa ang Ginebra sa giisip nga championship contender tungod sa presensiya sa two-time ‘Best Player of the Conference’ awardee nga si Mark Caguioa, Jones Cup MVP LA Tenorio ug mga top rookies nga sila si Chris Ellis ug Keith Jensen.

Apan ang Ginebra wa damha nga usa sa mga koponan nga mabutang karon sa ilawom nga bahin sa standing sa ilang 2-5 win-loss record.

“We’ve been trying to figure out what went wrong and we were searching for answers, but we couldn’t find one,” matud pa ni Jensen sa InterAKTV.com. “This is frustrating, big time.”

Ang crowd-darling sa PBA nga Ginebra nakahiagum sa laing sakit nga kapildehan niadtong Domingo sa mga kamot sa ilang sister-team nga San Mig Coffee Mixers, 78-68, atubangan sa liboan nila ka mga fans didto sa Smart Araneta Coliseum.

Sa laing bahin, laing ngil-ad nga balita ang nadawat sa Ginebra kagahapon human gideklarar nga nakahiagum og ACL injury ang sophomore player nga si Dylan Ababou ug kinahanglan nga mopahuway og unom ngadto sa walo ka buwan. (BANAT NEWS)