Lakers daog na gyud

CEBU, Philippines - Mikulit sa ilang unang daog karon nga season ang Los Angeles Lakers dihang mi-iskor og 28 puntos si Dwight Howard ug miamot si Kobe Bryant og 15 puntos aron ilubong ang Detroit Pistons, 108-70 kagahapon sa nagpadayong 2012-2013 NBA season didto sa Staples Center sa Los Angeles, California.

 Midugang pa gyud og 18 puntos si Metta World Peace ug may 14 puntos si Pau Gasol aron pakgangon ang ilang 0-3 start karon nga season. Ang Lakers kinsa nasugamak og 0-8 nga baraha sa  preseason, nahiagom og 0-3 sulod lang sa ikaupat nga higayon sa kasaysayan sa ilang franchise.

Si Jonas Jerebko maoy nangu sa Pistons sa iyang 18 puntos. Makutas nga six-game road trip ang atubangon karon sa Detroit ug ilang gipasanginlan ang tigbuhat sa skedyul nga wala mogamit og mapa tungod kay gikan sa California, mobiyahe sila ngadto sa Denver unya mobalik sa California sa dili pa motapon ngadto sa Oklahoma dayong balik didto sa Detroit.

Milabaw og 28 puntos ang Lakers sa first half ug miinat sa ilang labaw ngadto sa 36 puntos sa third quarter.         Gidominar ni Howard ang ilawom ug yano kaayong gibuntog ni Bryant ang nagdepensa kaniya ug siya maoy nahimong playmaker samtang wala pa si Steve Nash kinsa adunay piang sa walang tuhod.

Mao kadto'y unang daog sa Lakers sulod sa dul-an lima ka semana gikan pa sa ilang training camp.

Wala na pasudla'g dugay ang mga starters sa Lakers didto sa fourth quarter aron sila makapahuway tungod kay mobiyahe sila ngadto sa Utah ugma.

Gisugdan sa Lakers ang ilang season pinaagi sa pagyukbo sa Dallas, Portland ug sa ilang silingan nga L.A. Clippers. Usa lang ka higayon nga nahitabong nagsugod sila'g 0-4 sa franchise history ug kaniadto pang tuig 1957 diin nailhan pa sila isip Minneapolis Lakers.

Isip Los Angeles Lakers, nagsugod sila'g 0-3 kaniadto lang 1978  apan ang maong team midaug dayon og 15 sulod sa ilang 16 ka duwa.

Samtang nagpa-abot pa sa pagbalik ni Nash, si Steve Blake mihimo'g unom ka assists ug career high-tying nga lima ka steals isip starter. Ang backup guard nga si Darius Morris maayo sab nga nakaduwa ug sukwahi kini sa mga starters sa Detroit nga naglisod sa ilang opensa.

Gani, ang starting guard nga  Stuckey nahiagom og shooting slump atol sa ikatulong duwa diin mihimo siya'g 0 for 6 kagahapon ug aduna nay 1 for 23 shooting karon nga season. (GGM gikan sa NBA.com)(BANAT NEWS)