Mga batan-ongatleta mosalida

CEBU, Philippines - Nagkadaiyang sports events ang ipasundayag sa umaabot pipila ka adlaw atol sa paglusad sa ika-22 nga Cebu City Olympics diha sa dakung hawan sa Cebu City Sports Center.

Himoon kini karong Nobiyembre 8-11, 2012 apan sa dili pa ang kumpetisyon, adunay pagahimoon nga press conference ugmang adlawa, Nobiyembre 6 sa alas 10:30 sa buntag diin pagatamabongan kini sa mga opisyales sa Department of Education (DepEd) sa Region 7 ug usa ako sa gidapit ni CCSC manager ug chairman sa Local Organizing Committee nga si Ricky Ballesteros, Jr.

Ang mga mananaug niining maong kumpetisyon maoy ipadala ngadto sa Dumaguete City sa Negros Oriental ug maoy magdala sa ngalan sa Cebu City unya sa Disyembre 2, 2012 ug sila sab maoy modala sa bandera sa Sugbo sa Palarong Pambasa sunod tuig.

Usa gyud kini ka tinuod nga higala si Ricky Ballesteros ug hapit na mahurot ang akong bilib niining tawhana kay bisan og nakahibalo siya nga dili ako maoy mosuwat sa maong artikulo tungod ka maglisod na'g gawas ang akong gisuwat gikan sa uwahing semana sa Oktubre, iya gihapon akong apilon sa pag-imbetar kung dunay mga press conferences.

Nasayud man gud kini si Ballesteros nga konsehal pa lang kini si vice-mayor Augustus Joy Young, daan na akong nagsuwat og mga sports events diha sa sports center ilabi na gyud sa panahon nga buhi pa kadto si Mr. Juan "Dodong" Aquino, Jr.

Higala sa atubangan kini si Ballesteros ug higala sab siya kung motalikod ka na kay dili man siya traydor nga pagka-amigo dili parehas  sa uban mga maayo lang sa imong atubangan apan lahi maoy butahan kung motalikod ka kay iya kang tampokonog baraw sa bukobuko.

Busa motuo gyud ako niining pinulongan nga dunay amigo "through thick and thin".  Duna sa'y ubang amigo nga motagad lang nimo kung aduna kay ikahatag ug dunay amigo nga plastic kaayo'g tinagdan.

Salamat kaayo Ricky Boy sa imong pagdapit ug tungod kay dili man ako'y mosuwat niini, dinhi ko na lang sa SPORTSgab ipadangat ang akong pa-ambit ning imong gilusad nga kalihokan.

Kakugi ug dedikasyon sa trabaho ug ingon man sab ang pagkamapahiubsanon maoy mga birtud nga nakapasulbong sa career ni Ballesteros. Daghan kaayo siya'g gikuptan nga responsibilidad apan iya kining natarung og dala ilabi na ang iyang pagkasakop sa organizing committee sa Sinulog Foundation.

MVP MIBAKASYON. Naghisgot man gyud kita'g mga batan-ong atleta, atong ilakip dinhe sa maong lindog ang pagbisita ni Jerie Marion Pingoy, o "Koko" ang back-to-back juniors MVP sa UAAP nga nagduwa sa Far Eastern University (FEU) Baby Tamaraws kinsa mibakasyon makadali dinhi sa Sugbo atol sa paghandum sa Kalag-Kalag diin iyang nahimamat ang iyang mga paryente diha sa Maracas, barangay Lahug.

Mibalik na si Pingoy sa Manila aron mobalik na sab og praktis apan misaad siya nga mobakasyon pag-usab atol sa Pasko.

Si Pingoy kanhi player sa University of Cebu (UC) Junior Webmasters ug pipila lang siya sa mga Bisaya ilabi na gyud Sugboanong players nga naghatag og garbo sa Sugbo sa natad sa basketball ug tungod sa kamaayo niyang point guard, dali ra kaayo siyang nailhan sa Manila ug gani nahimo pa siyang sakop sa RP Team.

Good luck kanimo. More Power!!! (BANAT )