Carcar Mayor's Cup karong gabii na

CEBU, Philippines - Mosalida karong gabii ang mas paboritong SWU-Yayoy's Grill kinsa makigsangka batok sa Mac Mae Water Refillling Station atol sa pagbukas sa tinuig nga 3rd Nice Apura Carcar Mayor's Cup basketball tournament diin magpunsisok ang mga basketball fans gikan sa Nobiyembre 5-13 didto sa Carcar Sports Complex.

Ang sangka gikatakda karong alas 8:30 sa gabii matod pa ni Carcar sports commissioner Julie Flores.

Sa preliminary, magtakos ang Double R batok sa Can-asohan ubos sa local division nga gikatakda sa alas 7 sa gabii.

Ning pagsuwat, wala pa hisayri kung kinsa gyud ang moduwa alang sa Yayoy's Grill tungod kay matod pa ni coach Raul Alcoseba nga dili mahimong iyang gamiton ang tanang players sa Southwestern University (SWU) Cobras, ang seniors champions sa Cebu Schools Athletic Foundation, Inc. (CESAFI) tungod kay nagpreparar sila karon sa umaabot nga elimination round sa Cebu Leg sa Philippine Collegiate Champions League (PCCL) diha sa Cebu Coliseum.

Ang Mac Mae ni coach Jojo Romarate, gipangulohan sa kanhi tora-tora sa PBA nga si Jimwell Torion kinsa didto mosikat sa Red Bull ni kanhi coach Yeng Guiao.

Ugmang adlawa, mo-debut sab ang UV Lancers-Gullas batok sa SG Merchandise ni team owner Jason Arquizola ug coach Marvin Caro sa dili pa magbagat ang Yayoy's Grill batok UV-Gullas ubos sa single-round robin format.

Upat lang ka teams ang kumpirmadong misalmot sa Carcar Mayor's Cup tungod kay ang laing duha ka teams nga gidapit wala mopatim-aw atol sa press conferecne sa miaging semana nga gipahigayon didto sa Baseline Restaurant.

Sila mao ang Yayoy's Grill, UV Lancers-Gullas, Mac Mae ug SG Merchandise.

Ang kampiyon sa maong torneyo makadawat og P50 mil, ang second place makadawat ug P30 mil, ang third placer P20 mil pesos ug adunay consolation prize alang sa fourth placer nga P/10 mil.

Adunay upat ka events ang Carcar Mayor's Cup nga mao ang basketball, volleyball, motocross ug Lawn Tennis Super A singles tournament.  (BANAT)