CEBU, Philippines - Usa ka kasaysayan ang suwayan pagkulit sa British sports journalist nga si James Goyder kinsa usa ka sports writer nga mohimo sa labing una niyang professional boxing debut karong Nobiyembre 9 didto sa Marina Bay Sands Hotel sa Singapore.
Si Goyder kinsa anaa karon sa Pilipinas aron mo-cover og mga boxing event sama sa mga boxing card sa ALA Promotions, nakahukom nga personal nga buhaton ang kanunay niya nga masaksihan ibabaw sa ring.
“I was very lucky that I have been introduced to Sir Antonio Aldeguer who generously allowed me to train at the ALA Gym, which is the best place possible for a boxer to prepare for a fight,” matud pa sa 31-anyos nga si Goyder.
Si Goyder moaway batok sa Thai light middleweight contender nga si Syafiq ‘The Slasher’ Samad sa undercard sa WBA super featherweight title match tali nila ni Indonesian boxing superstar Chris John ug Thai Chonlatarn Piriyapinyo.
Si Goyder nag-train ubos sa giya ni kanhi Oriental and Pacific Boxing Federation (OPBF) welterweight champion Rev ‘The Gentle Giant’ Santillan. Ang Briton andam usab nga muhatag sa tanan niyang premyo sa maong away ngadto ni Santillan.
(BANAT NEWS)