Cebu Challenge Mountainbike race gilusad

CEBU, Philippines - Mihatag sa ilang todo suporta ang mga local nga opisyal sa tulo ka component cities ug upat ka municipalities sa nagsingabot nga 'Cebu Challenge Mountainbike One Day Road Race' sa Nobiyembre 18.

Ang maong lumba sugdan sa Talisay City ug moagi didto sa Tuburan ngadto sa  Naga-Uling Road ug Magdugo-Media Onse Road sa Toledo City.

Lakip sa mga mipadayag sa ilang suporta sa maong dakung mountainbike race naglakip nila ni Cebu First District congressional aspirant Samsam Gullas kinsa maoy commissioner sa Talisay City Sports Commission, Tuburan Mayor Democrito "Aljun" M. Diamante ug uban pang opisyal sa Naga, Toledo, Minglanilla, Asturias ug Balamban.

Mokabat ngadto sa kapin P100,000 cash prizes ang gitagana alang sa mga mananaug sa maong lumba.

"I would like to extend my profound gratitude to Samsam Gullas, Mayor Diamante of Tuburan and the rest of the local government officials who are fully supporting this endeavor," matud pa ni race organizer ug Cebu Sports Hall of Famer David "Kuya Boy" Odilao, Jr.  

Gawas sa mga mananaug, makadawat usab og espesyal nga Presidential Cup og dugang P5,000 ang rider nga modominar sa duha ka stages.

Ang registration gisugdan na sa Chopstick Chinese Casual Chow-Shopwise branch, Edfil Restaurant sa Citi Center ug Cycle Logic sa Parkmall. Ang entry fee nagkantidad og P300 lakip na ang jersey, packed lunch ug race bib. (BANAT NEWS)