BCH Martians mikamang sa 2nd place

CEBU, Philippines - Gipakgang sa BCH Martians ubos sa pagtimon sa ilang point guard nga si Edlin Endrina ang four-game winning streak sa kanhi wa'y pilde ug solo leader IBP-Gwapo pinaagi sa pag-iskor og 92-84 nga kadaugan nga milanat ngadto sa five-minute overtime atol sa nagpadayong elimination round sa Philippine Institute of Certified Public Accountants (PICPA) 2012 basketball tournament kaniadtong Miyerkules didto sa Capitol Parish gym sa dan Escario, ning dakbayan.

Naglabaw ang BCH Martian sa opening period, 20-17 ug namuntos na niadtong tungora silang Endrina ug Ryan Alejandre apan nakabawos ang IBP-Gwapo didto sa second period tungod sa hugot nga depensa nga gipasiugdahan nilang Al Lagahit ug Milky Villamor ug diriyot magkaguliyang ang Martians.

Nagtabla ang iskor sa halftime sa 32-all dihang milusad og 15-12 rally ang IBP-Gwapo nga giduslitan nilang Barry Busin ug Bads del Prado.

Nahimong sikit ang duwa didto sa third ug fourth periods hangtod miresulta kini'g 73-all nga tabla human mohuni ang buzzer sa regulation.

Ang duha ka free throws ni Ferdie Riveral sa IBP-Gwapo maoy naghatud sa duwa ngadto sa overtime.

Na-outscore sa BCH Martian ang IBP-Gwapo sa overtime period, 19-11 ug milampos pagdaug og otso puntos aron inaton ang ilang baraha ngadto sa 3-1 ug temporaryong naghupot sa ikaduhang pwesto.

Si Endrina maoy nangu sa BCH Martians sa iyang 25 puntos nga naglakip og lima ka three-pointers samtang midugang og 22 puntos si Alejandre.

Silang Del Prado ug Busi mibahug og 18 ug 12 puntos matag usa aron pangulohan ang IBP-Gwapo ug miamot sab og double figures silang Giovani Sususco, Villamor ug Riveral.

Sa laing duwa,  midaug ang Warriors Intangibles pinaagi sa default batok sa IBp-Team B aron magtabla sa 2-2 nga baraha.

Puntos matag usa:

MARTIANS (92)- Endrina 25, Alejandre 22, Oliveros 16, Ibo 15, Labra 8, Salubre 4.

IBP-Gwapo (84)- Del Prado 18, Busi 12, Sususco 11, Villamor 11, Riveral 10, Lagahit 9, Baguio 7, Narido 4, Liston 2. (BANAT NEWS)