2012 Bago cagefest buksan Oct. 27

CEBU, Philippines - Ang gikahinaman nga 2012 edition sa Barangay Bago Invitational Basketball Showdown gikatakdang sugdan sa Oktubre 27 didto sa Village covered court.

Matud pa ni tournament commissioner Engr. Dennis A. Montebon, nga upat ka seeded teams ang mopakita'g aksiyon sa maong torneyo nga kabahin sa kalihukan sa tinuig nga kapistahan sa Sagrada Familia, ang patron sa maong barangay karong Disyembre 30.

Kini mao ang ASA Five ni Poblacion councilor Kevin U. Maravillas sa Asturias, Cebu, GN  Bakeshoppe Campaigners ni Noel Cuizon Galo sa Langub, Asturias, Tuburan Selections ug Tsuneishi Heavy Industries (Cebu) Inc. sa Buanoy, Balamban, Cebu.

Sila si Hon. Urbanito Noel ug Bago, Asturias Brgy. Capt. Eliezar S. Dacaldacal, maoy mangulo sa mga opisyales atol unya sa opening program sa alas-7:30 sa gabii sa dili pa ang game proper.

 Unang magsangka mao   ang Tuburan ug Tsuneishi sa alas-8 sa gabii, sundan sa duwa tali sa ASA ug GN Bakeshoppe sa alas-9 sa gabii.

Ang torneyo mosagop og double elimination round robin diin ang top 2 teams maoy magsangka alang sa korona, samtang ang nahabiling duha magtigi alang sa  ikatulo nga dapit.

Ganting salapi ug tropeyo ang nagpaabot sa mga mananaog ning maong torneyo ubos sa giya ni Hon. Carmel M. Montebon, ang chairman sa committee on basketball. (BANAT NEWS)