Arce lalabanan lang si Donaire sa tamang presyo
MANILA, Philippines - Kung hindi niya makukuha ang gusto niyang presyo ay hindi aakyat si Jorge Arce sa ibabaw ng boxing ring laban kay WBO super-bantamweight king Nonito Donaire Jr.
Sinabi ng 33-anyos na Mexican na lalabanan lamang niya ang Filipino champion kung magugustuhan niya ang ibabayad sa kanya.
“I’m not asking for the pearls of the virgin. I’m demanding just what I think the price is worth,” wika ni Arce, isang dating world champion sa apat na magkakaibang weight classes.
Sinabi ni Arce sa BoxingScene.com na handa siyang labanan ang kahit sino, maging si Donaire.
“I am ready, as everyone knows I am ready to fight and end of the year with drums beating. I would be happy to take that fight but I hope I get the price,” sabi ni Arce.
Nauna nang nabanggit ang pangalan ni Arce bilang posibleng kalaban ni Donaire bago ito umatras dahil sa maliit na premyo.
Dahil dito, nilabanan na lamang ni Donaire si Toshiaki Nishioka sa Carson City at umiskor ng isang ninth-round technical knockout.
Marami pang maaaring itapat kay Donaire. At kabilang sa mga ito ay sina Abner Mares, Guillermo Rigondeaux at Anselmo Moreno.
Sinabi ni Donaire, kumita ng halos $800,000 para sa Nishioka fight, na bagay sa kanyang istilo ang laro ni Arce.
Ayon naman kay Arce, hindi siya bumilib sa panalo ni Donaire kay Nishioka.
“I’m not impressed (with Donaire). He’s not the monster they believe he is. What happens is that (his opponents) have too much respect they pull punches, start to survive and allow him to come in,” sabi ni Arce.
“I think Donaire has faced fighters who are afraid. I’m not going to have any respect,” dagdag ng Mexican matador na nagkampeon sa light-fly, super-fly, bantam at super-bantamweight division.
Gusto ni Bob Arum ng Top Rank na gawin sa Disyembre 15 ang Donaire-Arce fight sa Mexico City.
- Latest
