MEGA L.A., rulls bakeshop midaog

CEBU, Philippines - Miiskor og managlahing daog ang Mega L.A. ug Rulls Home Bakeshop sa nagpadayong aksiyon sa Lapu-Lapu Sports Club (LLSC) basketball tournament 2012    didto sa Crown Regency Hotel and Resorts basketball court sa Lapu-Lapu City.

Ang Mega L.A. yano kaayong mipugnit og daog dihang ilang gilumsan ang VKK Divers sa iskor nga 81-55, samtang ang Rulls Bakeshop miagi pa'g kulba una nila maangkon ang 68-66 nga kadaugan batok sa Megabond/ACP.

Sa gilauman, si Pompy Ngujo mao na usab ang nangulo sa kadaugan nga miani og 22 puntos, samtang si Gil Booc mipuno og 17 puntos alang sa Mega L.A. ni Lheo Almacin nga maoy midiktar sa duwa human miposte og otso puntos, 26-18 paghuman sa first period.

An nagkagidlay nga VKK Divers ni Victor Malingin gipangulohan ni Ronald Hortel, kinsa mikawas uban ang 14 puntos, gisundan ni Glenn Aying nga mihaw-as og 12 puntos.

Upat unta ka VKK Divers ang miiskor og double figures, apan nakawang lang kay wala nila matugkad ang gipangandoy nga kadaugan human sila pabuthi og 23-10 run sa Mega L.A. sa third period.

Sa laing bahin, si Edwin Amistad maoy topscorer sa Rulls Bakeshop nga migaling og 18 puntos, samtang sila si Alan Sepe ug Lachete misansan og 16 ug 14 puntos matag usa.

Ang Megabond/ACP gipangulohan ni Tibodan, kinsa mihabwa og 20 puntos. Si Jun Tampus mitali og 15 puntos, si Raul Damolo mirehistro og 12 puntos alang sa Megabond/ACP. Ang team owner nga si Neil Belga, kinsa miiskor og 30 puntos atol sa ilang kadaugan batok sa Ballaholics, wala kaayo kabuylo niini nga duwa ug igo lang mihipos og siyete puntos.

Karong gabii, aduna na gyu'y rekord nga mabulingan sa duwa tali sa Rollway Customs Brokerage ug Aries Lending.Ang Rollway ug Aries Lending nga pulos nagbitbit og 3-0 nga baraha, magsangka sa pasiunang duwa sa alas-7 sa gabii, sundan kini sa duwa tali sa RoRo Transport (1-1) ug sa Rulls Bakeshop (3-0) sa alas-8 sa gabii.

Ang liga nga gipahingusgan ni Billy Nadado, gipaluyohan ni Rolly dela Pieza, Alan Yu, Roilan Sumilang ug sa JB Sportswear.

PUNTOS MATAG USA

Unang duwa:

MEGA L.A. (81) - Ngujo 22, Booc 17, Asuncion 8, Ruiz 8, Amodia 7, Aparta 6, Sagarino 6, Gutib 4, Llenes 2

VKK DIVERS (55) - Hortel 14, Aying 12, Boy Guapo 11, Vellia 10, Dela Peña 8, Inso 7, Aquiles 2

Ikaduhang duwa:

RULLS BAKESHOP (68) - Amistad 18, Sepe 16, Lachete 14, Cortes 9, Celiz 6, Tempurada 6, Oyao 5

MEGABOND/ACP (66) - Tibodan 20, Tampus 15, Damolo 12, Oyao 8, Belga 7, Arac 5, Velasquez 4, Ybañez 1 (BANAT SPORTS)