Alaska vs. San Mig sa hoops dome

CEBU, Philippines - Mopakita na usab si Dondon Hontiveros sa iyang abilidad atubangan sa iyang mga Sugbuanong dumadapig dihang ang bag-o niyang team nga Alaska Aces moharong sa San Mig Coffee Mixers (kanhi B-Meg Llamados) sa bearing game sa "out-of-town" game sa 2012 PBA Philippine Cup sa Nobiyembre 10 diha sa Hoops Dome sa barangay Gun-ob, Lapu-Lapu City.

 Ang Aces nasugamak ngadto sa San Mig Coffee, 83-103 sa ilang opener niadtong Oktubre 5 ug bag-o usab kini napilde ngadto sa Meralco Bolts, 86-93 niadtong Miyerkules.

Apan timan-i, ang Alaska ni Cebuano-born business tycoon Wilfred Uytengsu Jr. maoy mikampiyon sa miaging 2012 Mayor Mike Rama Cup PBA pre-season games sa miaging   buwan diha sa Cebu   Coliseum diin ang San Mig Coffee usa sa misalmot sa maong four-team tournament.

Gawas ni Hontiveros, atngang moduwa alang sa Aces ni coach Luigi Trillo mao si kanhi Southwestern University (SWU) Cobras cager Cyrus Baguio, Sonny Thoss, Gabby Espinas, JV Casio, Mac Barracael, Tony de la Cruz, Sam Eman, Nic Belasco, Paulo Bugia, Brandon Cablay ug Eddie Laure.

Sa ilang bahin, ang powerhouse San Mig Coffee nga laraw mobalik sa finals sa maong conference magsalig sa ilang two-time MVP nga si James Yap uban nila ni Peter Jun Simon ug Marc Pingris.

Mokompleto sa line-up sa San Mig mao sila si Mark Barroca, Jonas Villanueva, Wesley Gonzales, Raffy Reavis, Jerwin Gaco, Joe Devance ug sa laing Sugbuanong basketbolista nga si Aldrech Ramos.

Ang mga tiket mahimo na nga mapalit sa Chris Sports sa Ayala Center-Cebu, SM City-Cebu ug SM-Consolacion, Hoops Dome, Lapu-Lapu City Hall ug Fairchild Coop.

Nagkantidad kini og P150 sa general admission, P350 sa upper box, P650 sa lower box ug P950 sa ringside.  (BANAT SPORTS)