UV midaog sa Passerelle title

CEBU, Philippines - Gibawi sa University of the Visayas (UV) Passerelle basketball team ang sakit nga kapildihan sa ilang juniors ug seniors team sa 12th Cebu Schools Athletic Foundation Inc. (CESAFI) finals pinaagi sa paglangkat sa korona sa Passerelle division sa Milo BEST Center SBP Passerelle Twin Tournament 2012 niadtong Domingo.

Mipatigbabaw ang UV batok sa University of San Carlos (USC) sa iskor nga 62-56 alang sa labing una nilang titulo sa ilang tulo ka tuig nga pangindahay.

Hinuon, dili sayon ang kadaugan, kay human miposte og 23-9 nga bentaha sa unang kuwarter, nalansang ang iskor sa UV ug igo lang nakapasud og usa ka punto sa kinatibuk-ang second quarter dihang mi-rally ang USC aron pahakan ang labaw, 24-23 sa halftime.

Dali hinuon nga nakabawi ang UV sa sunod kuwarter dihang si Jun Manzo mihabwa og otso puntos alang sa UV, kinsa miposte og 41-37 nga bentaha.

Nahimong kulbahinam ang duwa sa unang otso minutos sa final period dihang ang USC kanunay nga mihulga sa UV hangtod nga nagtabla ang iskor, 56-all sa nahabiling 2:02 sa duwa human sa split charities ni Kurt Amores.

Apan dali kining gitubag ni Fredrick Pasturan sa iyang lay-up aron hatagan ang UV og dos puntos nga labaw, 58-56 sa katapusang 1:52 sa duwa.

Ang MVP nga si Dave Cabanilla mipasud og usa ka free throw alang sa UV nga miposte og 59-56 nga labaw sa nahabiling 1:31 sa final period.

Daghan unta'g kahigayonan ang USC nga makan-an ang labaw, apan ang ilang mga tirada pulos mikagar.

Si Cabanilla, kinsa mitusak og laing tulo ka free throws aron kandadohan ang kadaugan, maoy nangulo sa UV pinaagi sa iyang 20 puntos, samtang si Manzo mitimbre og 10 puntos.

Si Carlo Ortega mao usab ang nangulo sa pilderong USC sa iyang 16 puntos, lakip na ang 12 puntos sa fourth quarter.

Sa gubat alang sa ikatulong dapit, ang Sacred Heart School-Ateneo de Cebu (SHS-AdC) milubong sa Cebu Eastern College (CEC) sa iskor nga 70-45.

Si Janjan Jaboneta mirehistro og game-high 19 puntos aron pangulohan ang SHS-AdC, samtang si Cris Dominic Yap mao usab ang nangu sa CEC pinaagi sa iyang 10 puntos.

Ang UV maoy morepresentar sa Cebu sa Visayas Regional Finals sa Nobiyembre 16-19 didto sa Iloilo City.

Sangkaon nila ang University of St. La Salle Bacolod, Ateneo de Iloilo ug Colegio de la Purisima Concepcion sa Roxas. (BANAT SPORTS)