Air21 express midagit sa Global Port
CEBU, Philippines - Nabingwit sa Air21 Express ang labing una nilang daog dihang ilang gipadunggo ang Global Port Batang Pier, 88-81, sa PBA Philippine Cup kagabii didto sa Smart Araneta Coliseum.
Ang maong kadaugan nakahatag og kompiyansa sa Air21 sa ilang kampaniya sa maong conference diin krusyal ang matag duwa tungod kay usa lang kini ka 14 game elimination round.
Sa maong kadaugan, ang Air21 nakabawi human sa sakit nilang, 87-90 nga kapildehan niadtong Miyerkules batok sa Barako Bull Energy Cola.
Hinay ang dagan sa duwa sa first half, apan nakabwelo ang Air21 sa third period diin nakuha nila ang sayes puntos nga labaw, 55-49, sa 3:13 sa maong kuwarter.
Nanginit usab ang opensa sa ‘Slam Dunk King’ nga si KG Canaleta diin mihimo kini og 10 sa iyang 12 puntos sa maong kuwarter aron inaton pa ang ilang labaw, 71-62, paingun sa final period.
Gawas ni Canaleta, laing misidlak alang sa Air21 mao ang higanteng rookie nga si Yousef Taha kinsa milangkat og 12 ka rebounds, kwatro puntos ug tulo ka steals.
Sa laing bahin, ang naparot nga Global Port nahimutang karon sa ilawom nga bahin sa standing human sila nakahiagum sa ilang ikaduhang sunod-sunod nga pilde. Nangulo sa Air21 mao si Willie Miller nga mirehistro og 18 puntos.
- Latest
- Trending
