CEBU, Philippines - Nailog na sa University of the Visayas (UV) Green Lancers ang pabor human makabangon gikan sa 11 puntos nga pagkalubong aron moiskor og 69-65 nga kadaugan batok sa Southwestern University (SWU) Cobras sa Game-3 sa "best-of-five" championship series sa 12th Cebu Schools Athletic Foundation Inc. (CESAFI) basketball event kagabii didto sa Cebu Coliseum.
Usa na lang ka daog ang kinahanglan sa UV Green Lancers aron hingpit nilang makuha ang ilang ika-10 nga korona.
Ang Game-4 gitakda ugma sa alas-5:30 sa hapon diha gihapon sa Cebu Coliseum.
Ang UV Green Lancers gilubong og 10 puntos, 35-46 human sa dunk ni Benoit Mbala atubanga ni Hernal 'Wowie' Escocio sa nahabiling 3:58 sa third period. Apan ang UV Green Lancers mipahimulos sa ilang kasinatian sa kampiyonato aron mapapas ang maong labaw.
Si Eman Calo, kinsa migradwit, maoy nangulo sa UV Green Lancers nga miburak og 14 puntos. Si Jerome Silva mitikdol og 13 puntos, samtang ang 6-foot-7 Nigerian recruit nga si Steve Cedrick Akomo ug Phil Mercader mitimang og 10 puntos matag usa.
Sila si Mbala ug Bernie Bregondo parehong mitukob og 11 puntos alang sa SWU Cobras, samtang sila si Joseph Nalos ug Bonifacio Guillena III mihirit og 10 puntos matag usa. (BANAT SPORTS)