Boom Boom nagpanikad na sa PPXVII

CEBU, Philippines - Nagpanikad na si ALA Boxing Gym superstar Rey 'Boom Boom' Bautista sa iyang sangka batok ni Mexican knockout artist Daniel Ruiz sa "Pinoy Pride XVII: Philippines vs. the World" sa Oktubre 20 didto sa SM Mall of Asia Arena sa kaulohan.

Giklaro ni Bautista nga padayon gihapon siya sa iyang todo-ensayo karon nga nagkaduol na ang adlaw alang sa iyang sangka.

Ang garbo sa Candijay, Bohol, mosuway pagsakmit sa WBO International featherweight title nga maoy iyang pasaporte alang sa iyang damgo nga moaway pagbalik alang sa world title.

"Andam na si Boom Boom!" matud pa ni Bautista, kinsa tinguhang makigsangka ni WBO champion Orlando Salido o makig-rematch ni Daniel Ponce De Leon, kinsa maoy nagkupot karon sa WBC title.

Ang 26-anyos nga si Bautista katapusang miaway niadtong Marso didto sa Tagbilaran City, apan wala siya mahatagi og kahigayonan nga mapakita ang iyang tinuoray nga labok kay usa ka peke nga Genaro Garcia ang iyang gikasangka.

Ang Bautista-Ruiz bout maoy supporting bout sa WBO bantamweight title fight tali nila ni ALA No. 1 contender AJ 'Bazooka' Banal ug Thai Pungluang Sor Singyu. (BANAT SPORTS)