Maguikay, Jagobiao naka- bangon sa Insular Square Gateball League Prexy Cup

CEBU, Philippines - Nakabangon ang Maguikay SuperNiners ug Jagobiao Blazers human masugamak sa ilang duwa dihang ilang gipahimungtan ang tagsa-tagsa nilang karibal sa ikatulong adlaw sa Insular Square Gateball League-The President's Cup niadtong Sabado didto sa dakbayan sa Mandaue.

Ang Maguikay unang miyukbo ngadto sa Umapad Linkers, 9-14 sa ilang duwa sa buntag, apan nakabawi pagka-hapon pinaagi sa pagpilde sa Subangdaku Winemakers, 20-11.

Ang Japanese import sa Maguikay nga si Yasuhiro Kuromatani mipasulod og labing daghan lima ka goals, ingon man ang iyang teammates nga sila si Erlinda Dinoy ug Sunny Baluga.

Ang Blazers napilde sab ngadto sa Casuntingan Villagers, 12-18 ug nakarekober kini human nila gilubong ang Umapad, 21-14.

Ang team captain sa Jagobiao nga si Celestino Piolo mitira og lima ka goals uban nilang Joey Danuco ug Guillermo 'Dodong' Baclayon. (BANAT SPORTS)