1-1 tie buakon karon

CEBU, Philippines - Tuyo karon sa nine-time champion University of the Visayas (UV) Green Lancers, ang topseed karong tuiga ug ang title contender Southwestern University (SWU) Cobras nga buk-on ang ilang 1-1 nga tabla aron mokuha'g 2-1 nga bentaha atol sa Game 3 sa ilang best-of-five championship series ubos sa collegiate division sa nagpadayong 12th season sa Cebu Schools Athletic Foundation, Inc. (CESAFI) didto sa Cebu Coliseum.

 Ang duwa gikatakdang himoon karong alas 6 sa gabii.

Mikulit dayon og daog ang Cobras sa Game 1 sa iskor, 77-72 sa miaging semana nga maoy labing una nilang daog sulod sa tulo ka panagbagat karon nga season ug mas tam-is ang maong kadaugan tungod kay nahitabo man kadto atol sa championship.

Apan dihang nagtuo ang kadaghanan nga maka-una sa 2-0 ang Cobras aron maglawig na ngadto sa labing una nilang korona sa CESAFI, misumbalik kanila ang Lancers ug midaug human sa usa ka sikit ug kulba-hinam kaayong duwa sa Game 2 sa iskor, 81-79 aron tablahon ang serye sa 1-1 nga baraha.

Kung kinsa man ang palaran nga modaug karong gabhiona atol sa Game 3 ug mo-abante sa 2-1, mahimo na nilang tiwason ang serye sa sunod adlaw.

Walay nakabentaha sa pormahay tali sa duha niining duha ka heavyweight nga collegiate teams tungod kay malagmit sab nga breaks lang gihapon maoy makatabang sa duwa apan seguradong depensa sab maoy rason sa kadaugan.

Nagpakita sa iyang abilidad sa Game 2 si John Michael Abad dihang midaug ang Lancers ug sa maong duwa, na-foul ang duha ka sentro nga Cameroonian sa Cobras nga silang Benoit Mbala ug Justine Aboude ug kalit lang nahimong patas ang away tungod kay foul trouble sab ang import sa Lancers nga si Steve Cedrick Akomo ug wala na pabalika sulod sa korte.

Aduna sa'y gisaligang alas ang Cobras way lain ang ilang tirador sa gawas nga si Monbert Arong kinsa moay motimbang sa laing streak shooter nga si Bonifacio Guillena III samtang mosuportar kanila si Bernie Bregondo, Joseph Nalos ug Benito Ortuyo alang sa opensa.

Sa laing bahin, wala pa kaayo makahuygo silang Jerome Silva ug Phil Mercader kinsa wala gyud maka-buto og maayo sa serye apan nakatabang na silang Abad ug Eman Calo ug naka-rekober na sab ang bag-ong MVP nga si Wowie Escocio kinsa walay nahimo sa Game 1 dihang gipahit sila sa Cobras.

Ang laing Lancers nga gilaumang dako og ikatabang naglakip kanilang Rene Jun Saycon, Chris Perolino, Rhaffy Oktubre ug Vincent Mendoza.

Kung kinsa man ugaling ang modaug, dili pa matag-an apan segurado nga ang makauna sa 2-1, dako na'g purohan nga maoy mahimong kampiyon samtang ang mapilde kinahanglan sab makatabla sa 2-2 aron magpabiling buhi sa lain pang adlaw.