Pacquiao pababagsakin si Juan Ma--Donaire
MANILA, Philippines - Naniniwala si unified world super bantamweight champion Nonito ‘The Filipino Flash’ Donaire, Jr. na mapapatumba ni Manny Pacquiao ang kanyang karibal na si Juan Manuel Marquez sa kanilang ikaapat na pagkikita.
Sa panayam ng ATG (All-Time Great) Radio Show sa United States, sinabi ni Donaire na kailangan lamang ni Pacquiao na maibalik ang kanyang dating bilis at lakas para mapabagsak si Marquez sa Disyembre 8 sa MGM Grand sa Las Vegas, Nevada.
“And I think that Manny, who has speed and his power, and if he can push it, I think that he’s going to win the fight. I think if Manny can bring in his speed and be smart about it like he has in the beginning; just that sheer, raw talent that he has, that raw energy that he has, I think that he can overwhelm Marquez,” sabi ni Donaire kay Pacquiao.
Isang draw ang nailusot ni Marquez sa kanilang unang laban noong 2004 bagamat tatlong beses na bumagsak sa first round, habang isang split decision win naman ang nakuha ni Pacquiao sa kanilang rematch noong 2008.
Umiskor naman ang 33-anyos na si Pacquiao ng isang majority decision victory sa kanilang ikatlong paghaharap ng 39-anyos na si Marquez noong Nobyembre 12, 2011.
Si Marquez ang sinasabi ni trainer Freddie Roach na tanging boksingerong alam ang kilos at kahinaan ni Pacquiao.
“But again, Marquez already has his number,” wika ni Donaire. “Both fighters know each other well. It might look to be the same type of fight to me. Unless somebody has a different idea heading into this fight, I think it’s going to be a close fight.”
Sasagupain ng 29-anyos na si Donaire ang 36-anyos na si Japanese challenger Toshiaki ‘Speed King’ Nishioka ng Japan sa Oktubre 13 sa Home Depot Center sa Carson, California.
Idedepensa ni Donaire (29-2-0, 18 KOs) ang kan-yang mga bitbit na International Boxing Federation (IBF) at World Boxing Organization (WBO) super bantamweight crowns kontra kay Nishioka (39-4-3, 24 KOs). (Russell Cadayona)
- Latest
- Trending
