SWU nakauna

CEBU, Philippines - Giputol sa Southwestern University (SWU) Cobras ang duha nila ka kapildihan ngadto sa University of the Visayas (UV) Green Lancers pinaagi sa pagkulit og 77-72 nga kadaugan aron angkonon sa Game-1 sa ilang "best-of-five" championship series 12th Cebu Schools Athletic Foundation Inc. (CESAFI) didto sa Cebu Coliseum.

Bisan og na-foul out ang ilang idlas nga pointguard nga si Joseph Nalos ug ang back-up big man Bernie Bregondo, nakasustenir gihapon ang Cobras tungod kay nangigo si Bonifacio Guillena III sa gawas. Nakatabang pagkontrolar sa offensive ug defensive rebounds silang Benoit Mbala ug Justine Aboude.

Ang Cobras kaduha mapilde sa Green Lancers, usa sa elimination ug laing usa sa quarterfinals, apan kagabii, mas determinado sila ilabi na sab nga wala makahuygo ang mga pambato sa UV nga silang Steve Cedrick Akomo, Phil Mercader, Jerome Silva, Eman Calo ug ang MVP nga si Wowie Escocio.

Nagmangtas ang Cobras sa fourth period dihang miposte sila’g 15 puntos nga labaw, 72-57 sa nahabiling 5:20 sa maong kuwarter pinaagi sa three-pointer ni Guillena.  

Usa ka hansak ni Aboude maoy mitiwas sa duwa alang sa Cobras.

Balanseng opensa ang gipakita sa Cobras diin upat kanila ang mibahog og double figures pinangulohan ni Guillena sa iyang 19 puntos. Si Bregondo miamot og 13 puntos, samtang si Aboude miamot og 12 puntos ug Nalos igo gyud nakaabot og 10 puntos.

Ang Lancers kinsa kinahanglan modaug ugma aron makatabla sa 1-1, gipangulohan ni John Michael Abad sa iyang 17 puntos.

Si Escocio nga maoy napiling MVP maoy nangulo sa mythical five uban nilang Monbert Arong, Jerome Silva, Quinton Brian Heruela ug Abulaiz Suliman.  (BANAT SPORTS)