Game-1 na UV batok SWU

CEBU, Philippines - Suwayan sa nine-time champion University of the Visayas (UV) Green Lancers pagbawi sa ilang korona sa dihang ilang sangkaon ang Southwestern University (SWU) Cobras sa Game-1 sa ilang "best-of-five" finals sa 12th Cebu Schools Athletic Foundation Inc. (CESAFI) basketball event karong adlawa diha sa Cebu Coliseum.

Ang duwa gitakda alas-5:30 sa hapon.

Ang UV Green Lancers ug SWU Cobras parehong napakyas pagsakmit sa korona human mapilde ngadto sa University of Cebu (UC) Webmasters sa miaging duha ka tuig.

Ang UV Green Lancers nga gidala kaniadto ni coach Elmer 'Boy' Cabahug, gipalagpot sa ilang trono sa UC Webmasters nga gipangulohan ni June Mar Fajardo niadtong 2010 CESAFI finals sa baraha nga 3-1.

Sa miaging tuig, ang SWU Cobras miyukbo sab ngadto sa UC Webmasters sa usa ka halandumon kaayong Game-5.

Sa pagkatagak sa UC sa finals nga igo lang nakaangkon sa ikaupat nga dapit, ang korona karong tuiga pagailogan na sab sa mas gipalig-ong Lancers ug sa uhaw nga Cobras, kinsa nagsalig sa ilang duha ka Cameroonian imports.

Ang UV Green Lancers mas inilog karon kay ila man gilatos ang SWU Cobras sa miagi nilang duha ka duwa, apan si coach Raul 'Yayoy' Alcoseba, masaligon nga ilang mabuntog ang higante ug bangis nga kaatbang.

Nakabentaha ang UV Green Lancers sa gitas-on ug duna sab sila’y gihuptan nga "championship experience."                                     Si UV Green Lancers coach Felix 'Donbel' Belano mosalig nilang 6-foot-7 Nigerian import Steve Cedrick Akomo ug Hernal 'Wowie' Escocio nga maoy mobangga sa lawas nilang Justine Aboude ug Benoit Mbala.

Itugyan ni Belano ang iyang pagsalig ngadto nilang Jerome Silva, John Michael Abad, Eman Calo, Phil Mercader ug Rene Jun Saycon.

Sa habig sa SWU Cobras, sila si Aboude ug Mbala nanginahanglan usab og suporta    gikan nilang Monbert Arong, Bonifacio Guillena III, Bernie Bregondo, Joseph Nalos, Jestoni Casquejo, Mierben Dedace ug Daryl Goloran. (BANAT SPORTS)