Game 1 sa UV JRS. batok SHS-ADC karon

CEBU, Philippines - Suwayan karong hapon sa defending champion University of the Visayas (UV) Baby Lancers pagsumpo ang pagdominar kanila sa Sacred Heart School-Ateneo de Cebu (SHS-AdC) Magis Eagles atol sa Game 1 sa juniors division best-of-five championship showdown sa nagpadayong 12th season sa Cebu Schools Athletic Foundation, Inc. (CESAFI) didto sa Cebu Coliseum.

Ang duwa gikatakda karong alas 5:30 sa hapon.

Ugma na sab sugdan ang gikahinamang collegiate championship showdown tali sa topseed UV Green Lancers batok sa Southwestern University (SWU) Cobras nga usa sab ka best-of-five series.

Sa miaging duha nila ka pagbagat, parehong gilubong sa Magis Eagles ang Baby Lancers sa iskor nga 15 puntos nga kadaugan---97-82 kaniadotng Agosto 30 diin ilang naharus ang elimination round ug laing 96-81 nga kadaugan niadtong Septiyembre 16 diin diriyot matagak sa finals ang Baby Lancers.

Hinoon, bisan og midailos sila ngadto sa 1-2 nga baraha sa semifinal, maoy nakakuha sa labing taas nga quotient ang Baby Lancers sa usa ka triple-tie tali sa CIT-U Baby Wildcats ug CEC Dragons nga maoy nag-ilog alang sa ikatulong pwesto nga naangkon sab sa Baby Wildcats sa miaging semana.

Mao kini ang ikatulong higayon nga miabante sa finals ang Magis Eagles ug matag tuig, nagpakita sila'g dakung kausaban sa ilang duwa aron daghan ang makumbensir nga hinog na sila aron pag-angkon sa titulo nga mihaplot sa ilang mga kuko sa miaging tulo ka tuig diin sila kanunay ang Cinderella. 

Sa 2010, giharus sila sa Dragons kinsa mihimo'g school record human giharus ang tanang duwa gikan sa elimination hangtod sa finals. Sa miaging tuig, napilde sila sa Baby Lancers, 3-2 sa usa ka kulbahinam kaayong Game 5 sa iskor, 82-85.

Ang mupalig-on sa kampanya sa kugihan nga Magis Eagles mao ang ilang leading scorer nga si Henric Dawn Ochea, point guards Arc Gabriel Araw-araw ug Rendell Thomas Senining ug mga back-ups nga silang Miguel Competente, Jair Igna, Arnie Padilla, Fletcher Kriss Galvez, Giovanni Laguyo ug Felixberto Jaboneta IV.

Sa laing bahin, ang Baby Lancers mosalig sa ilang reigning MVP Andres Paul Desiderio ug abagan siya nilang Gerald Fernandez, Prince Litton Canete, Ralph Jude Dinolan, Leonard Santillan ug Ernesto Limitares.

Napamatud-an sa duha nila ka pilde nga bisan og dagku'g iskor si Desiderio, dili gihapon kini magsilbi kung wala siya'y suportang makuha gikan sa laing mga teammates ilabi na sa opensa.