CEBU, Philippines - Nagkinahanglan na lang og usa ka daog ang Goldberry Suites aron mobalik sa finals human ilang gipukan ang Insular Square, 63-50 sa semifinal round sa 17th Sacred Heart-Ateneo Alumni Basketball Athletic Association (SHAABAA) didto sa SHS-ADC gym sa barangay Canduman sa dakbayan sa Mandaue.
Sa laing bahin, naka 1-0 sab dayon ang Cebu Landmasters human ilang gipilde ang Dynamic Power, 64-54.
Gipakita ni Dave Lim kun nganong siya maoy pirmeng mahimong MVP sa SHAABAA dihang iyang gipangulohan ang Goldberry sa iyang 22 puntos, 11 puntos niini nahimo sa third period.
Si Giovanni Borromeo mitampo og 12 puntos, samtang si Paulsen Uy miamot og 10 puntos.
Ang Insular Square gipangulohan ni Franz Cimafranca pinaagi sa iyang 14 puntos, gisundan ni Joseph Shan nga adunay 11 puntos.
Sa laing aksiyon, si Kevin Villamor mikadlit og 19 puntos, samtang silang Franco Te ug Ervin Lopena mitunol og 11 puntos matag usa alang sa Cebu Landmasters.
Misikit na unta ang Dynamic Power, apan si Te miposa og duha ka three-pointer aron kandadoan ang duwa.
Si Allan Ong mihakot og 17 puntos alang sa Dynamic Power, samtang si Mark Sy miabuno og 15 puntos. (BANAT SPORT)