UC-USJ-R magtigi alang sa ikatulong dapit

CEBU, Philippines - Gipalagpot nga kampiyon University of Cebu (UC) Webmasters makigtakus sa   University of San Jose-Recoletos (USJ-R) Jaguars alang sa ikatulong puwesto sa 12th Cebu Schools Athletic Foundation Inc. (CESAFI) basketball event karong adlawa diha sa Cebu Coliseum.

Sa samang paagi, magbagat ang Cebu Eastern College (CEC) Dragons ug ang Cebu Institute of Technology-University (CIT-U) Wildkittens   sa ilang kaugalingong "best-of-three" series alang sa ikatulong puwesto sa juniors division.

Ang "best-of-five" finals tali sa University of the Visayas (UV) Green Lancers ug Southwestern University (SWU) Cobras sa collegiate division ug sa Sacred Heart School-Ateneo de Cebu (SHS-AdC) Magis Eagles batok sa UV Baby Lancers sa juniors division unya pa duwaon sa Septiyembre 25.

Silang Quinton Brian Heruela, Kim Gomez, Kido Cabrera, Robinson Mohammad ug John Michael Auditor mao lang ang pipila sa mga saligan sa UC Webmasters, samtang ang USJ-R Jaguars magsandig nilang Abulaiz Suliman, Miguel Tabaloc, James Regalado, Jason Olbedado ug Banjo Capillar.

Sa laing bahin, ang CEC Dragons maghangad sa abilidad nilang Mark Vincent Berdera ug Manuel Grijaldo, samtang ang CIT-U Wildkittens maglaum nilang Mark Kong ug Charles Patindol. (BANAT SPORT)